Almatyda janarmaı qymbattasa, jolaqysy kóterile me

ALMATY. QazAqparat - Almaty qalalyq kólik pen avtomobıl joldary basqarmasynyń basshysy Maqsut Isahov janarmaı baǵasynyń qymbattaýynan jol aqysy kóterilmeıtinin aıtty, dep habarlaıdy QazAqparat tilshisi.

«Bizde 3 avtobýs parki gazben jumys jasaıdy. Trolleıbýs parki bar. Jekemenshik avtoparkter janar-jaǵarmaı, dızel otynyn paıdalanady. Qazir memleket janarmaı baǵasyn rettemeıdi. Ony naryq ózi qalyptastyrady. Árıne, olarǵa ońaı emes. Biraq saralanǵan tarıf engizilgennen beri avtoparkterdiń tabysy eki esege artty. Zańdy aqsha aınalymy kórinip tur qazir. Júıeniń ashyqtyǵy burynǵy kóleńkeli ekonomıkanyń kórinisterin joıa bastady. Aqsha júrgizýshiniń qaltasyna emes, ortaq kassaǵa túsip jatyr. Buǵan jeke avtoparkterdiń 254 jańa avtobýs satyp alýǵa jasalǵan kelisimsharty dálel bolady», - dedi basqarma basshysy.

Onyń aıtýynsha, dızel otynyny jaǵatyn tasymaldaýshylar óz kúnin ózi kórýi tıis.

«2016 jyldyń qyrkúıeginen dızel otynyn satyp alýǵa qarjy berýdi toqtattyq. Óıtkeni otyn baǵasyn memleket rettemeıdi. Sonda da qazir dızelge tapshylyq joq. Baǵany naryq retteıdi. Alaıda, jol júrý aqysy kóterilmeıdi», - dedi M.Isahov.