Almatyda jańadan salynyp jatqan metro beketine Baýyrjan Momyshulynyń esimin berý kerek - B. Smaǵul

ALMATY. QazAqparat- Almatyda Abaı dańǵylynyń boıynda B. Momyshuly kóshesimen qıylysar tusta jańadan salynyp jatqan metro beketine Baýyrjan Momyshulynyń esimin berý kerek. Bul týraly keshe Almatyda B. Momyshuly atyndaǵy respýblıkalyq áskerı mektep-ınternatynda Keńes Odaǵynyń Batyry, qaharman qolbasshy Baýyrjan Momyshulyna arnalǵan eskertkish-músinniń ashylý saltanatynda QR Parlamenti Májilisiniń depýtaty, Aýǵan soǵysy ardagerleri uıymdarynyń «Qazaqstan ardagerleri» qaýymdastyǵynyń tóraǵasy, aqyn Baqytbek Smaǵul málimdedi.

Onyń aıtýynsha, bul usynys eger oń sheshimin tabar bolsa, Uly Jeńistiń 70 jyldyǵyna oraı, Baýyrjan Momyshulynyń ǵana emes, sol surapyl soǵysta qan tókken barsha jaýynger ata-babalarymyzdyń rýhyna jasalǵan zor qurmet bolar edi.

«Bul qadam syrt kózge ses, al urpaǵymyzǵa es bolar edi. Kezinde, 2010 jyly Halıla Omarov ekeýmiz «Qazaqtyń Baýyrjany» degen derekti fılmdi túsirý úshin Máskeýge barǵan kezimizde Volokolamsk qalasynyń ákimi Vasılıı Shýlepov: «Uly Otan soǵysynda mıllıondaǵan jaýynger soǵysty. Biraq, qazaq halqynyń qaısar rýhty uldarynyń arqasynda fashıster Máskeýdi basyp ala almady», - degen bolatyn. Máskeýde «Almaty» metro beketi bar, al Almatydaǵy jańa metro beketteriniń biri «Máskeý» dep ataldy. Bul, eki el arasyndaǵy dostyqtyń altyn kópiri ispettes. Sondyqtan, dostyqtyń shekarasynda shek bolmasyn, arada ótken oqıǵalardan kek bolmasyn, urpaq sabaqtastyǵy jalǵassyn desek, jańadan salynyp jatqan metro beketine Baýyrjan Momyshulynyń esimin bergen jón. Bul usynysty Almaty qalasynyń ákimdigi qup kóredi degen úmittemin», - dedi B. Smaǵul.