Almatyda jańa týǵan nárestelerdi ınternet-saıt arqyly saýdalaǵan
Ondaǵy málimetterge qaraǵanda, jańa týǵan balalarynan bas tartqysy keletin jas áıelder olardy zańmen belgilengen tártipti buza otyryp, ýákiletti organdar men sottyń tıisti sheshiminsiz «satyp alýdy» usynady.
Sonymen qatar saıtta balalardy osylaı asyrap alǵysy keletin adamdardyń jappaı habarlandyrýlary bar ekeni anyqtaldy.
QR «Neke (erli-zaıyptylyq) jáne otbasy týraly» Kodeksiniń 196-babyna sáıkes taýyp alynǵan, tastandy (bas tartylǵan) balanyń týýy ishki ister organdarynyń, qorǵanshylyq nemese qamqorshylyq jónindegi fýnktsııalardy júzege asyratyn organnyń, bilim berý uıymdary ákimshiliginiń nemese bala ornalastyrylǵan medıtsınalyq uıymnyń ótinishi boıynsha taýyp alynǵan, bas tartylǵan nemese qaldyrylǵan kúnnen bastap jeti táýlikten keshiktirilmeı tirkelýge tıis.
«Buqaralyq aqparat quraldary týraly» Zańnyń 2-babynyń 4-tarmaǵyna sáıkes qylmystyq jáne ákimshilik quqyq buzýshylyqtar jasaý maqsatynda buqaralyq aqparat quraldaryn paıdalanýǵa tyıym salynady.
Osyǵan baılanysty Alataý aýdanynyń prokýrory sotqa saıtty zańsyz dep taný jáne onyń Qazaqstan aýmaǵyndaǵy qyzmetin toqtatý týraly ótinishpen júgindi. Sot qadaǵalaý organynyń ótinishin qanaǵattandyrdy.
Materıaldar QR QK-niń 128-babynda kózdelgen qylmysty jasaý, ıaǵnı adam saýdasy mánine tekserý júrgizý úshin quqyq qorǵaý organdaryna jiberildi.
«Atalǵan qylmystyq quqyq buzýshylyq úshin múlki tárkilenip, 15 jylǵa deıingi merzimge bas bostandyǵynan aıyrý túrindegi jaza kózdelgen»,-delingen habarlamada.