Almatyda jańa mektep sport alańdary salynýda

ALMATY. QazAqparat - Almatynyń barlyq aýmaǵynda jańa zamanaýı mektep stadıondar men oıyn alańdary ashylady. Bul týraly óńirlik kommýnıkatsııalar qyzmetinde ótken brıfıngte qalalyq bilim basqarmasynyń basshysy Lázzat Jylqybaeva aıtty, dep habarlaıdy QazAqparat tilshisi.

Onyń aıtýynsha, qazirgi ýaqytta 40-tan astam qalalyq mektep alańy qaıta jańartylyp jatyr. Sportpen shuǵyldaný, salaýatty ómir salty – basqarma jumysynyń negizgi baǵyttarynyń biri.

«Biz joǵary deńgeıdegi sporttyq baǵyttaǵy qaýipsiz alańdar jasaǵymyz keledi», - dedi bilim basqarmasynyń basshysy.

Sonymen qatar, ol qazir Almaty qalasy bilim basqarmasy memlekettik-jekemenshik áriptestik jobasy aıasynda №10, 42, 63, 93, 94, 104, 128, 173, 181, 189 mektepterdiń 8 sport alańyn jáne kópsalaly kolledj jańǵyrtylyp jatqanyn jetkizdi.

«Investıtsııa kólemi 400 mln teńgeden asady. Buǵan deıin osy joba aıasynda №40 jáne 95 mekteptiń aýmaǵynda sport alańdary jańartyldy», - dedi Lázzat Jylqybaeva.

Spıkerdiń sózinshe, jańa sport alańdary mektep oqýshylaryn qyzyqtyratyn orynǵa aınalady. Búgingi kúni 33 mektep pen №1 balalar úıiniń sport alańdary jańartylyp jatyr. Oǵan jergilikti bıýdjetten 1 mlrd astam teńge qarastyryldy.

«Bıyl Almaty qalasy ákimdiginiń memlekettik tapsyrysymen qala mektepterinde oqýshylarǵa arnalǵan sport sektsııalary uıymdastyrylady. Aıta keterligi, jattyqtyrý jumysymen aınalysatyn dene shynyqtyrý muǵalimderiniń aılyqtaryna ústemaqy qosylady»,- dedi spıker.