Almatyda jańa kempıng aımaǵy ashyldy

ALMATY. QazAqparat- «Aqbulaq» kempıng aımaǵy taý demalysyn, trekıngti, haıkıngti jáne shatyr tigip, uzaq ýaqyt serýendeýdi unatatyndarǵa arnalǵan jabdyqtalǵan jazǵy lager, dep habarlaıdy QazAqparat tilshisi.

Qalalyq ákimdiktiń málimetinshe, týrısterdi qyzyqtyrar jańa núkte megapolıske jaqyn jerde «Medeý» jolynda kórki kóz tartar «Kókjaılaý», «Úsh aǵaıyndy», «Qumbel» jáne taǵy basqa tanymal taý baǵyty bar Aqbulaq («Prosveşenets») shatqalynda ornalasqan.

«Kempıng aımaqta jaıly ári qaýipsiz demalýǵa barlyq jaǵdaı jasalǵan, 5 shatyr, jaıly samaljaılar, oryndyǵy bar ústelder, ulttyq naqyshtaǵy «Altybaqan» átkenshekteri ornalasqan»,- dep habarlady ákimdikten.

«Aqbulaq» - sońǵy jyldary Almaty qalasy týrızm basqarmasy ashqan jetinshi kempıng aımaq. Jyl sońyna deıin taǵy ekeýin ashý josparda.

«Aqbulaq» kempıng aımaǵynyń mekenjaıy: Almaty qalasy Kereı jáne Jánibek han kóshesi, «Aqbulaq» aıaldamasy.

Almaty qalasynyń týrızm basqarmasy demalýshylardan tabıǵatty aıalaýdy, taýǵa qoqys tastamaýǵa shaqyrady ári taýǵa shyǵý kezinde qaýipsizdik erejesin saqtaýdy eske salady:

- Taýǵa bara jatqanda, jaqyndaryńyzǵa baǵytyńyz týraly habarlaý qajet.

- Aýa-raıyna saı kıinip, kún sáýlesinen qorǵanyńyz. Qajetti jabdyqty, bas kıimdi, sýdy, portatıvti qýattaǵysh pen qýattalǵan telefon alyp shyǵyńyz.

- Taý soqpaǵynan basqa jaqqa shyqpańyz.

- Qutqarý qyzmetiniń SMS eskertýlerine mán berińiz.