Almatyda jalǵan kýálikpen ózin Antıkor qyzmetkeri retinde tanystyrǵan turǵyn ustaldy

ASTANA. QazAqparat - Almatyda ózin Antıkordyń qyzmetkeri etip kórsetip kelgen turǵyn ustaldy, dep habarlaıdy QazAqparat QR Sybaılas jemqorlyqqa qarsy is-qımyl agenttiginiń baspasóz qyzmetine silteme jasap.

Aǵymdaǵy jyldyń 6 qańtarynda Sybaılas jemqorlyqqa qarsy qyzmettiń Ózindik qaýipsizdik departamenti Almaty qalasy PD ÁPB arnaıy batalonynyń qyzmetkerlerimen birlesip, jolda júrý erejelerin buzǵany úshin ákimshilik jaýapkershilikke tartylmaý maqsatynda ózin Sybaılas jemqorlyqqa qarsy qyzmettiń qazirgi qyzmetkeri retinde tanystyrǵan 1987 jyly týǵan azamat Ulan Raıdy áshkereledi.

Qujattardy tekserý barysynda quqyq buzýshy Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttigi departamenti qyzmetkeriniń jalǵan qyzmettik kýáligin kórsetken.

Atalǵan azamat ustalyp, ýaqytsha ustaý ızolıatoryna qamaýǵa alyndy.

Tergeý jalǵasýda. Tergeý múddesi úshin ózge aqparat jarııa etýge jatpaıdy.

Qyzmettik kýálikterdi qoldan jasaý QR Qylmystyq Kodeksiniń 385-baby boıynsha qylmystyq jaýaptylyqqa ákep soqtyrady.

Osy azamattyń qatysýymen quqyqqa qarsy is-qımyl faktileri boıynsha qandaı da bir aqparat bolǵan jaǵdaıda, Sybaılas jemqorlyqqa qarsy qyzmettiń Call-ortalyǵyna 1424 nemese 8 [phone] nómiri boıynsha habarlasýǵa bolady.