Almatyda jalǵa beriletin páter baǵasy sharyqtap ketti
Ahmetovtar otbasynyń Almatyda páter jaldap turyp jatqandaryna 15 jyl bolǵan. Otaǵasy taksı júrgizishisi bolyp jumys isteıdi, jary Juldyz eki balasymen úı sharýasynda. Úlken uly - múgedek.
«Baspanǵa kezekte tur. Jalǵa alatyn páterdiń 50 paıyzyn memleket tólep beredi», - degen jańalyqty estigen olar qatty qýandy. Alaıda ol qýanyshtary uzaqqa sozylmady.
«Biz jalǵa beriletin turǵyn úıdi sýbsıdııalaýǵa jatatyn tórt sanattyń ishindemiz. Múgedek balamyz bar. 15 jyl boldy, páterdi qala syrtynan jaldap kelemiz. Sebebi sál bolsa da arzan. Endi mamyrdan bastap memleket úlken qoldaý kórsetpekshi. Oǵan qatty qýandyq, alaıda qýanyshymyz uzaqqa sozylmady. Bir apta boldy, Almatydan eki bólmeli páter izdep júrgenime. Baǵasy sharyqtap ketken. 200-220 myń teńgeniń tóńireginde. Onyń jarty baǵasynyń ózi bizge úlken salmaq»,- deıdi Juldyz Ahmetova.
Ol «Otbasy bank» AQ-nan ótinim berý protsesin testileýge qatysý týraly SMS-shaqyrtý alǵanyn da tilge tıek etti.
«Meniń oıymsha, jalǵa beriletin páter baǵasyn baqylaý qajet. Bul múmkindikti páter ıeleri jibermeıtini anyq. Aptanyń basynda meniń telefonyma SMS-shaqyrtý keldi», - deıdi ol.
Rıeltor Kárim Shýhratov jalǵa beriletin páterlerdiń baǵasy kúrt qymbattap ketkenin aıtty.
«Áleýmettik osal toptar úshin páter jaldaýǵa arnalǵan sýbsıdııa beriletinin estigen úı ıeleri baǵany kóterip tastady. Suranys kóbeıe bastady. Buryn bir bólmeli páter 110-130 myń teńge aralyǵynda bolsa, qazir 160-180 myń teńge suraıdy. Men ortasha baǵasyn aıtyp turmyn. Qalanyń joǵary bóliginde 500 myń teńgege ótkizetinder de bar», - deıdi Kárim Shýhratov.
Rıeltorlardyń sózinshe, jyl saıyn belgili bir mejege deıin ósetin jalǵa berý aqysy eshqashan tómendemeıdi. Máseleni memlekettik deńgeıde retteıtin kez keldi.
Aıta keteıik, jalǵa beriletin turǵyn úıdi sýbsıdııalaýǵa ótinim qabyldaý bastaldy.
Eske salsaq, Qazaqstanda 70 myńnan astam otbasy turǵyn úı jaldaý aqysyna sýbsıdııa alady.