Almatyda zeınetkerdi soqqyǵa jyqqan er adam ustaldy

ALMATY. QazAqparat – Áleýmettik jelide egde jastaǵy áıeldi soqqyǵa jyqqan er adam týraly vıdeo taraǵan bolatyn. Almaty qalasy Alataý aýdanynyń prokýratýrasy kúdikti ustalyp, polıtsııa bólimshesine jetkizilgenin málim etti, dep habarlaıdy QazAqparat tilshisi.

«Alataý aýdany polıtsııa basqarmasynyń qyzmetkerleri arnaıy sharalar júrgizý barysynda kúdiktiniń tulǵasyn anyqtap, ony polıtsııa basqarmasyna jetkizdi. Qazirgi tańda atalǵan tulǵaǵa qatysty arnaıy tergeý áreketteri júrgizilýde. Onyń áreketine tıisti baǵa berilip, zańdy protsessýaldy sheshim qabyldanady», - dep habarlady Alataý aýdanynyń prokýratýrasynan.

Vedomstvo málimetinshe, 74 jastaǵy áıeldi óziniń 50 jastaǵy uly urǵan.

«Alataý aýdanynyń polıtsııa basqarmasy 1972 jyly týǵan S.A.V.-ǵa qatysty óziniń 1948 jyly týǵan S.N.I. anasyna asa qatygezdikpen, buzaqylyq nıetpen, qasaqana densaýlyǵyna ortasha aýyr zııan keltirý deregi boıynsha tergeý júrgizip jatyr. Qazirgi tańda jábirlenýshige qatysty sot-medıtsınalyq saraptama taǵaıyndaldy. Qylmysty tergeý barysy prokýrordyń jeke baqylaýynda», - dedi prokýratýradan.

Buǵan deıin habarlaǵanymyzdaı, syrtqy beınebaqylaý kamerasyna jazylǵan vıdeoda aldymen, eki áıel arasynda janjal shyqqanyn, keıin er adam olardyń birin jerge jyǵyp, ura bastaǵanyn kórýge bolady.