Almatyda zardap shekken kásipkerlerge paıyzy tómen nesıe beriledi

ALMATY. QazAqparat - Jappaı tártipsizdik kezinde zardap shekken almatylyq kásipkerlerge «Almaty» áleýmettik-kásipkerlik korporatsııanyń kepildigi nemese jartylaı kepildigi arqyly 12 aı merzimge jylyna 2%-ben 10 mln teńgege deıin nesıe beriledi. Bul týraly shahar basshysy Baqytjan Saǵyntaev aıtty, dep habarlaıdy QazAqparat tilshisi.

Almatyny odan ári damýy jónindegi qalalyq aktıv otyrysynda qala ákimi búlik kezinde zardap shekken bıznes ókilderin qoldaý úshin qalalyq «Almaty bıznes-2025» baǵdarlamasyna birqatar ózgeris engiziletinin jetkizdi.

«Zardap shekken shaǵyn jáne orta bıznes sýbektilerin qoldaý maqsatynda 2%-y kredıt taǵaıyndalady. Shekti somasy 10 mln teńgege deıingi kredıttiń merzimi 12 aı. Sondaı-aq Infokazakhstan.kz portalyna júgingen kásipkerlerdiń kredıti men ósimpuly 180 kúnge deıin shegeriledi. Búkil kásipkerlerdi qoldaý maqsatynda jarty jylǵa deıin kredıt berýdiń joǵary shegi saqtalady. Oǵan qosa kepilsiz kredıttiń jyldyq mólsherlemesi tómendeıdi, ıaǵnı 12 paıyzdan 9%-ǵa deıin»,- dedi Baqytjan Saǵyntaev.

Buǵan deıin ol Almatyda zardap shekken kásipkerler 3 aı kommýnaldyq qyzmet aqysyn tólemeıtinin aıtqan bolatyn.