Almatyda zardap shekken 1253 ShOB sýbekti ókilderi ótemaqy alady
16:41, 08 Aqpan 2022
ALMATY. QazAqparat - Almatyda zardap shekken 1253 ShOB sýbekti ókilderi ótemaqy alady. Bul týraly Prezıdenttiń qatysýymen ótken Úkimet otyrysynda Almaty ákimi Erbolat Dosaev málim etti, dep habarlaıdy QazAqparat tilshisi.
Erbolat Dosaev jappaı tártipsizdik kezinde zardap shekken ShOB sýbektileriniń 88 paıyzy Almatyǵa tıesili ekenin atap ótti.
«Aldaǵy 2-3 aptada kásibi zardap shekken bıznes ókilderiniń 82 paıyzy, ıaǵnı 1253 sýbektisi ótemaqy alady. Qalǵan 274 kásipkerge ótemaqy saraptama jumystary aıaqtalǵan soń tólenedi. Jalpy qańtar oqıǵasynda qalada 1527 kásipkerdiń múlkine nuqsan keltirilgen»,- dedi Almaty ákimi.
Budan bólek bıyl 50 myń jańa jumys orny qurylmaq. Onyń 31 myńy bıznes tarapynan ashylady. Sondaı-aq qala turǵyndarynyń naqty tabys kózin 5 paıyzǵa, al jalpy ishki ónim kólemin tórt jarym paıyzǵa ósirý josparlanyp otyr.