Almatyda zańsyz júrgen Tájikstan men Ózbekstan azamattary eline qaıtaryldy
Qalanyń kóshi-qon qyzmetiniń málimetinshe, bul shetel azamattary Qazaqstanda zańsyz júrgen.
«Mıgrant» jedel-aldyn alý is-sharasy aıasynda kóshi-qon zańnamasyn buzǵany úshin Ózbekstan men Tájikstannyń 18 azamaty ákimshilik jaýapkershilikke tartyldy. Olar qalanyń aýdanaralyq mamandandyrylǵan ákimshilik sotynyń sheshimimen memleketimizden shyǵaryldy. Atalǵan elderdiń Qazaqstan Respýblıkasyndaǵy konsýldyq qyzmetiniń kúshimen azamattar Ózbekstan Respýblıkasynyń shekarasyna deıin reıs avtobýsymen jetkizildi. Olarǵa dıplomattarmen elge oralý týraly kýálik berildi», – deıdi Almaty qalalyq PD Kóshi-qon qyzmeti basqarmasynyń bastyǵy Ashat Býtýnchınov.
Polıtsııanyń málimetine sáıkes, tájirıbe kórsetkendeı, zańsyz júrgen kelimsekter kóbine qylmystyq qol suǵýshylyqtyń nysanyna aınalady nemese olardy ózderi jasaıdy.
Aıta keteıik, Almatyda «Mıgrant» is-sharasy zańsyz kóshi-qon arnalaryn, sheteldikterdi zańsyz jumysqa ornalastyrý derekterin anyqtaý maqsatynda ótkizilip jatyr.