Almatyda zańsyz salynyp jatqan taǵy bir turǵyn úı kesheni anyqtaldy
Almaty qalalyq Qurylys baqylaý basqarmasynyń aqparatyna sáıkes, qazirgi ýaqytta Observatorııa kóshesi, 104/4 mekenjaıynda ornalasqan «Mechta» taýnhaýsy boıynsha sot talqylaýlary júrip jatyr.
Jospardan tys tekserý barysynda Almaty Qala qurylysyn baqylaý basqarmasy turǵyn úı kesheniniń 1-shi núktesinen kelisilgen eskızdik jobadan aýytqý bolǵanyn tirkedi. Sondaı-aq 2-shi núktede ruqsat qujattamasy bolmaǵanyn anyqtady. Búgingi tańda 1-shi núkteni menshik ıesi óz betinshe paıdalanýǵa bergen.
«Byltyr 14 qazannan bastap tapsyrys berýshi ÁQBtK-niń 462-baby boıynsha nusqamany oryndamaǵany úshin (memlekettik baqylaý jáne qadaǵalaý organdary (laýazymdy adamdar), memlekettik organdardyń laýazymdy adamdary óz quzyreti sheginde bergen zańdy talaptardy nemese nusqamalardy, usynymdardy, qaýlylardy oryndamaǵany nemese tıisinshe oryndamaǵany úshin) jaýapqa tartyldy»,- dep atap ótti Almaty qalasy ákimdiginiń baspasóz qyzmetinen.
Basqarma nysandy paıdalanýǵa qabyldaý jáne buzý aktisiniń kúshin joıý týraly sotqa talap-aryz joldady, sot talqylaýlary júrip jatyr.
«Sondyqtan, qala turǵyndaryna joǵaryda atalǵan mekenjaı boıynsha turǵyn úı kesheninen jyljymaıtyn múlik satyp alýdan bas tartqan jón.
Jyljymaıtyn múlikti satyp almas buryn salynyp jatqan turǵyn úı kesheni týraly Qala qurylysyn baqylaý basqarmasynyń +7 705 89 66 000 WhatsApp jedel jelisi nómiri boıynsha habarlasyp, aldyn ala qujattardyń tolyq paketin tekserip alýdy eskertemiz»,- delingen habarlamada.
Buǵan deıin Almatyda birneshe turǵyn úı kesheninde páterler satylymǵa zańsyz shyǵarylǵany týraly jazǵan edik.