Almatyda zańsyz salynǵan taǵy bir turǵyn úı kesheni anyqtaldy
Almaty qalalyq qurylys baqylaý basqarmasynyń aqparatyna sáıkes, ınternet-resýrstarda Shashkın, 42/1 kóshesinde ornalasqan «Maison» turǵyn úı kesheninde páterler satylatyny jóninde habarlandyrýlar jarııalanǵan.
«Atalǵan jer ýchaskesiniń nysanaly maqsaty – jerasty parkıngi bar ákimshilik ǵımarat salý jáne paıdalaný bolyp tabylady. Al sáýlet-josparlaý tapsyrmasy medıtsına ortalyǵynyń qurylysyna alynǵan. Qalalyq qurylys baqylaý basqarmasy menshik ıesine qatysty QR Ákimshilik quqyqbuzýshylyq týraly kodekstiń 316-baby 1-bóligi boıynsha anyqtalǵan buzýshylyqtardy joıý boıynsha uıǵarym shyǵardy. Sondaı-aq qurylys-montajdaý jumystaryn májbúrlep toqtatý týraly sotqa talap-aryz berildi»,- delingen ákimdik aqparatynda.
Sonymen birge basqarma ókilderi shara qoldaný úshin Ekonomıkalyq tergeý departamenti men Memlekettik kirister departamentine hat joldady.
Almatylyqtar jyljymaıtyn múlikti satyp almas buryn +7 (727) 229-81-36 nómiri boıynsha salynyp jatqan turǵyn úı kesheni týraly tolyq aqparat ala alady.
Buǵan deıin Almatyda úsh turǵyn úı kesheniniń zańsyz salynyp jatqany týraly jazǵan edik.