Almatyda zańsyz salynǵan kólik jýý nysany súrildi
Almaty qalalyq qala qurylysyn baqylaý basqarmasy «Shuǵyla» shaǵyn aýdany, Jaqsybaev kóshesi, 5 mekenjaıyndaǵy ǵımarat ruqsat qujattarynsyz salynǵanyn habarlady.
Basqarma menshik ıesine qatysty jospardan tys tekserý júrgizgen. Nátıjesinde kólik jýý qyzmetin kórsetken nysan tehnıkalyq jáne avtorlyq qadaǵalaýsyz, belgilengen tártippen saraptamadan ótpegen jobalaý-smetalyq qujattamasyz, sharýashylyq tásilmen salynǵanyn anyqtady. Odan bólek, nysan paıdalanýǵa berý aktisinsiz paıdalanylǵan.
«2022 jyly 7 shildede menshik ıesine qatysty QR Ákimshilik quqyq buzýshylyq týraly kodeksiniń 316-babynyń 1, 321, 323-bóligi boıynsha ákimshilik sharalar qabyldandy jáne anyqtalǵan buzýshylyqtardy joıý týraly nusqama berildi. 17 qyrkúıekte basqarma Almaty qalasy Naýryzbaı aýdandyq sotyna zańsyz salynyp jatqan nysandy buzý týraly talap aryz joldady. Al bıylǵy 11 qańtarda Almaty qalasy Naýryzbaı aýdandyq sotynyń sheshimimen talap aryz qanaǵattandyryldy, alaıda menshik ıesi apellıatsııalyq shaǵym túsirdi. 12 sáýirde qalalyq sottyń qaýlysymen birinshi satydaǵy sottyń sheshimi ózgerissiz qaldyryldy. Jaqynda sot sheshimin oryndaý úshin zańsyz nysan májbúrli túrde buzyldy», - dep habarlady Almaty qalalyq qala qurylysyn baqylaý basqarmasynyń baspasóz qyzmeti.