Almatyda XI azamattyq forým ótip jatyr

ALMATY. QazAqparat - Almatyda XI  azamattyq forým jumysyn bastady. Jıynda bas qosqan  ortalyq jáne jergilikti memlekettik organdar, úkimettik emes uıymdardyń ókilderi azamattyq qoǵamnyń damý máselelerin sóz etti, dep habarlaıdy QazAqparat tilshisi.

QR Din isteri jáne azamattyq qoǵam mınıstrliginiń Azamattyq qoǵam máseleleri komıtetiniń tóraǵasy Álııa Ǵalymova qoǵamdyq keńes jumystarynyń azamattardyń belsendiligin arttyra túskenin aıtty.

«Búginde Qazaqstanda eriktiler qozǵalysyna óte úlken mán berilip keledi, normatıvti baza jasaldy,  statýstary men negizgi túrleri aıqyndaldy. Mınıstrlik 2018-2020 jyldarǵa arnalǵan jol kartasyn jasady. Qazaqstan eriktiler qozǵalysy júıeli formatqa kóship keledi. Búginde Qazaqstanda memlekettik áleýmettik tapsyrys kólemi 20 mlrd teńgege jetken. Sonymen qatar, azamattyq qoǵamnyń jergilikti ózin-ózi basqarý protsesine de qatysyp, ashyq suhbat alańdaryn qurýǵa septigimizdi tıgizetin bolamyz»,- dedi Álııa Ǵalymova.

Qala ákiminiń orynbasary Arman Qyryqbaev azamattyq qoǵamnyń damýynda áli de sheshilmegen máseleler az emestigin alǵa tartty.

Onyń ishinde oqý ornynyń ustazdary men stýdentteri, ÚEU, saıası qoǵamdyq uıym ókilderiniń is-áreketiniń úılestirilýi jetkiliksiz.

«Negizinen bul salada normatıvtik-quqyqtyq baza jetildirýdi talap etedi. Búginde áreketsiz otyrǵan uıymdar óte kóp. Uıymdardy jabý protsesiniń ózi úlken jumysty talap etedi»,- dedi Arman Qyryqbaev.

Onyń aıtýynsha, Almaty elimizdiń iri megapolısi bolǵandyqtan, azamattyq belsendilik ortasy bolyp qala bermek.

Munda 4 000 ÚEU, 1000 BAQ, 173 dinı birlestik tirkelgen.

Sońǵy 3 jylda Almatyda memlekettik tapsyrys kólemi 2 ese artyp, 2,3 mlrd teńge boldy.

«Almatynyń 2020 jylǵa deıin damý baǵdarlamasy halyqtyń talqylaýymen qabyldanǵan alǵashqy strategııalyq qujat. Qalany abattandyrý, kórkeıtý jumystarynda da mindetti túrde turǵyndardyń oı-pikiri elenedi. Halyq pen aradaǵy baılanysty nyǵaıtý maqsatynda áleýmettik jelide qala ákimdiginiń akkaýnttary ashyldy. Open Almaty qoǵamdyq qabyldaýy jumys jasap tur»,- dedi Arman Qyryqbaev.

Azamattyq forým ótkizý týraly bastamany birneshe jyl buryn Elbasy Nursultan Nazarbaev kótergen bolatyn.

15 jylda forým yqpaldy suhbat alańyna aınaldy.

Bıyl respýblıkalyq azamattyq forým qarashanyń 27-28 kúnderi Astanada ótedi. Oǵan 600 ÚEU, memlekettik organ qyzmetkerleri qatysady.

Almatyda ótken forýmnyń basty maqsaty -  Astanada úlken minberden aıtylatyn máselelerdi pysyqtaý men baratyn delegattardy irikteý bolyp otyr.