Almatyda volonterler iz-túzsiz joǵalyp ketken 69 adamdy tapty
Brıfıng barysynda qalalyq Jastar saıasaty basqarmasy basshysynyń orynbasary Ázız Qajdenbek pen Almaty qalasy boıynsha volonterler front-ofısi QAMQOR CHARITY qoǵamdyq qorynyń tóraǵasy Baǵdat Anarbaeva volonterlik qozǵalystar qandaı jobany júzege asyryp jatqanyn baıandap berdi.
Ázız Qajdenbektiń sózinshe, megapolıste 30 volonterlik uıym jumys isteıdi. Oǵan 50 myńnan astam adam tartylǵan.
«Bizdiń qalada Depo Evolution Park ortalyǵy bar. Bul – jastardyń jınalatyn jeri. Volonterlik keńsemiz osy ortalyqta ornalasqan. Volonterlik front-ofıstiń basty maqsaty – túrli uıymdardy biriktirip, jobalardy birlese júzege asyrý»,– dedi ol.
Front-ofıs volonterler men volonterlik uıymdarǵa keńes berý jáne qoldaý kórsetý qyzmetin atqarady, onyń jumysy memlekettik áleýmettik tapsyrys sheńberinde júzege asyrylady.
«Front-ofıstiń jumysy jastardyń qalanyń áleýmettik-ekonomıkalyq, áleýmettik, sporttyq ómirine belsene qatysýyn arttyrýǵa baǵyttalǵan, volonterlik qyzmetke tartylǵan azamattardyń úlesin arttyrýǵa, olardyń memlekettik organdarmen ózara árekettesý tetikterin jetildirýge baǵyttalǵan, memlekettik mekemeler men azamattardy halyqtyń áleýmettik mańyzdy máselelerin sheshýge qatysýǵa tartý»,– dedi Baǵdat Anarbaeva.
Sonymen qatar qalalyq eriktiler túrli jobalardy uıymdastyryp, ótkizedi. Máselen, «Narkostop» jobasy aıasynda almatylyq jastar tyıym salynǵan zattardyń jarnamasyn boıaý boıynsha turaqty jumys júrgizdi. Bul aktsııalar megapolıstiń úlken aýmaqtarynda ótkiziledi.
«Eriktiler iz-túzsiz joǵalǵandardy izdeýge belsendi túrde qatysýda. Jyl basynan 30 adamnan turatyn erikti jasaq 69 adamdy taýyp, qutqardy»,- deıdi spıker.
Budan bólek, eriktiler qart adamdarǵa kómektesý úshin kúsh biriktiredi. Jalǵyzbasty zeınetkerlerdiń bos ýaqytyn qyzyqty ótkizýdi uıymdastyrý maqsatynda apta saıyn «Keńestik kıno keshi» ótedi.
Balalar úıiniń tárbıelenýshileri volonterler nazarynan tys qalmaǵan.
«Sabaqtastyq» baǵyty aıasynda 27 is-shara ótti. Onyń ishinde túrli sheberlik synyptary men kásiptik baǵdar berý, qustarǵa jem salatyn jáshik jasaý, qolóner jáne mánerlep syrǵanaý, «Januıa» balalar úıiniń tárbıelenýshilerimen VR ortalyǵyna saıahat, «Balalar aýyly», «SOS», «Jastar úıi» jáne taǵy basqalary. Atalǵan sharalarǵa 80-nen astam erikti men 200 bala qatysty.
Qala eriktileri Túrkııadaǵy jer silkinisinen zardap shekkenderge gýmanıtarlyq kómek kórsetý jumystaryn da belsendi uıymdastyrdy. Olar 51,5 tonnadan astam júk jınap, jóneltti.
Osy jyldyń naýryz aıynda «Men jaýapty donormyn» atty qan tapsyrý naýqany uıymdastyryldy. Qan tapsyrýdy uıymdastyrýdaǵy basty maqsat – zardap shekkender men qanǵa muqtaj jandarǵa kómek kórsetý. Aktsııaǵa Almaty qalasynyń jastary, sondaı-aq túrli qoǵamdyq jáne qaıyrymdylyq uıymdarynyń ókilderi, jýrnalıster men qoǵam belsendileri qatysty.
«Jastar saıasaty basqarmasy eriktilermen birlesip, «Jasyl el» jobasyn júzege asyrýdy josparlap otyr. Bul joba jastardy jazǵy ýaqytta jumyspen qamtý, bos ýaqyttaryn uıymdastyrý maqsatynda josparǵa engizildi. Bul rette Almaty qalasynyń ákimi Erbolat Dosaev bekitken jastardy qoldaýdyń jol kartasyna sáıkes, 10 myń qala jastaryn jumyspen qamtý qarastyrylýda»,- dedi qalalyq Jastar saıasaty basqarmasy basshysynyń orynbasary Ázız Qajdenbek.