Almatyda VICh taraǵan aýrýhanada epıdemıologııalyq tergeý bastaldy – mınıstr

ASTANA. QazAqparat – Almaty qalasyndaǵy aýrýhanada naýqastardyń adamnyń ımmýndyq tapshylyq vırýsyn (AITV/VICh) juqtyryp alýyna baılanysty epıdemıologııalyq tergeý bastaldy. Bul týraly Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Byltyr ımmýndyq tapshylyq vırýsymen 4 myń adam aýyrdy. Onyń arǵy jylynda 3,5 myń jańa jaǵdaı tirkelgen bolatyn. Almatydaǵy jaǵdaı boıynsha aqparat kelip tústi. Komıssııa jiberdik. Biz aýrýhana ishinde vırýs taraýyna jol bergimiz kelmeıdi. Tekserý ótken soń tolyqqandy aqparat beremiz», - dedi vedomstvo basshysy Senatta tilshilerge.

Sondaı-aq ol atalǵan komıssııa quramynda mınıstrliktiń eń úzdik mamandary bar ekenin aıtty.

«Endi tolyqqandy epıdemıologııalyq tergeý júrgizýimiz kerek. Aýrýhana ishinde taralmaý úshin ınfektsııanyń oshaǵyn taýyp, juqtyrý joldaryn anyqtaý qajet. Mınıstrlik pen komıtetterdiń eń úzdik mamandary sol jaqqa jiberildi», - dedi mınıstr.

Eske salaıyq, keshe Almaty qalalyq ortalyq klınıkalyq aýrýhanasynda jatqan 3 naýqastan adamnyń ımmýndyq tapshylyq vırýsy anyqtalǵanyn jazǵan edik.