Almatyda úzdik shyqqan 40 startap joba ınvestıtsııa alýǵa daıyndyqty bastady
Búgin Almatydaǵy «ІT-kvartalda» «Startup Kazakhstan» halyqaralyq jobasynyń TMD boıynsha alǵashqy kezeńinen iriktelip shyqqan joba ıelerin oqytý jáne daıyndaý jumystary bastaldy. Baǵdarlamany júzege asyryp otyrǵan «PIT» Avtonomdy klaster qorynyń jetekshisi Sanjar Kettebekov úzdik shyqqan jobalardyń mańyzdylyǵyna toqtaldy.
«Búgin biz «Startap Qazaqstan» jobasynyń resmı bóligin bastadyq. 40 startap bizge kelip, oqytý men daıyndyqty (akseleratsııa-red) bastady. Bul kezeńniń mindeti - startaptarǵa Qazaqstan naryǵyna kirýge jaǵdaı jasaý jáne ekonomıkamen durys úılesimdilik tabýdy úıretý. «Start-ap Qazaqstan» baǵdarlamasy TMD men Qazaqstan naryǵyna arnalǵan jobalardy jınaýmen aınalysady. 200 startap bıyl akseleratsııadan ótip, qarjylandyrylady. Jyldyń ekinshi jartysynda olar «Astana Hub» ortalyǵynda ornalasatyn bolady. Onda Astana halyqaralyq qarjy ortalyǵymen tyǵyz baılanysta bolady. Qarjylandyrylatyn startaptardyń sanyn jyl saıyn arttyra bermekpiz», - dedi ol.
Startap Qazaqstan jobasynyń alǵashqy kezeńine ótinishterdi qabyldaý 2017 jyldyń 15 jeltoqsanyna deıin júrdi. Barlyǵy 200 ótinish kelip túsken. Sonyń ishinde 40 jobaǵa ǵana irikteýden ótip, akseleratsııany bastady. Іriktelgen 40 jobanyń 50 paıyzy qazaqstandyq qatysýshylardan kelip túsken. Olardyń alǵashqy ınvestıtsııasy 20 myń AQSh dollary kóleminde bolady. Akseleratsııadan keıin olardyń ishindegi eń úzdigi 100 myń AQSh dollar kólemindegi qarjyny ala alady. Startaptardy «TECHGarden» jáne GVA Capital - GVA Alatau Fund venchýrlik qorlary qarjylandyrady.Jalpy 2020 jylǵa deıin 500 ınnovatsııalyq jobany qarjylandyrý josparlanǵan.