Almatyda úzdik munaıshylar «Asyl eńbek» ordenimen marapattaldy
Halyqaralyq KIOGE-2015 «Munaı jáne Gaz» konferentsııasy barysynda ótken marapattaý rásiminde «KazService» Qazaqstannyń servıstik kompanııalary odaǵynyń tóraǵasy Almas Qudaıbergen bul ordenniń tuńǵysh ret resmı túrde belgilengenin málim etti.
«Munaı servısi salasynyń damýyna baǵa jetpes úles qosyp kele jatqan mamandardyń eńbegin baǵalaý úshin biz «Asyl eńbek» ordeni men «Munaı servısi salasynyń damýy úshin» medalin taǵaıyndaǵan edik. Biz medaldardy qyzmetkerlerge taratyp qoıdyq. Al endi alǵashqy bes qurmetti qyzmetkerimizge osy «Asyl eńbek» ordenin tabystaımyz», - dedi A. Qudaıbergen.
Osydan keıin, Qazaqstannyń servıstik kompanııalary odaǵy tóralqasynyń tóraǵasy Rashıd Jaqsylyqov osy salanyń damýyna úles qosqan bes qurmetti azamatty «Asyl eńbek» ordenimen marapattady. Olardyń ishinde QR Energetıka vıtse-mınıstri Maǵzum Myrzaǵalıev te bar.
Aıta ketelik, «QazServıs» odaǵy elimizde munaı jáne gaz salasynda qyzmet kórsetetin 120-dan astam servıstik kompanııany biriktiredi. Bul salada búgingi tańda 200 myńnan astam eńbek etedi. Odaqtyń maqsaty - munaı-gaz salasynda qyzmet kórsetetin qazaqstandyq kompanııalardyń múddesin qorǵaý.