Almatyda uıymdasqan top jańa týǵan nárestelerdi satýmen aınalysqan

NUR-SULTAN. QazAqparat – Almaty qalasynyń tártip saqshylary jańa týǵan sábılerdi satý faktilerin anyqtady. Bul týraly Іshki ister mınıstrliginde ótken brıfıng barysynda baspasóz qyzmetiniń ókili Shuǵyla Turlybek aıtty, dep habarlaıdy QazAqparat tilshisi.

«Almaty qalasynda polıtsııa qyzmetkerleri jedel-aldyn alý is-sharasyn júrgizý barysynda zańsyz asyrap alý maqsatynda jańa týǵan balalardy satý faktilerin anyqtady.

Aldyn ala sóz baılasqan adamdar toby ózderiniń balalarynan bas tartqysy keletin júkti áıelderdi jáne balasy joq otbasylyq juptardy izdestirýmen, sondaı-aq balalardyń týý týraly jalǵan kýálikterin daıyndaýmen aınalysqany anyqtaldy. Atalǵan fakti boıynsha kámeletke tolmaǵandardy satý babymen sotqa deıingi tergep-tekserý bastaldy. Kúdiktiler ustalyp, ýaqytsha ustaý ızolıatoryna qamaldy», - dep málim etti baspasóz qyzmetiniń ókili.

Sondaı-aq búgingi brıfıng barysynda Shuǵyla Turlybek jezókshelik qyzmet kórsetken 20-dan astam prıton anyqtalǵanyn aıtqan bolatyn. Onyń málimetinshe, Shymkentte kámeletke tolmaǵandardy jezókshelikpen aınalysýǵa májbúrlegen qylmystyq top ustaldy.

Budan bólek, ótken aptada esirtki zerthanasyn uıymdastyryp, izdeýde júrgen kúdikti qolǵa túsken. Jalpy jyl basynan 23 esirtki zerthanasy áshkerelengen.