Almatyda úshinshi temirjol vokzaly qaı jerde salynady

ALMATY. QazAqparat- Almatyda Boraldaı eldi mekeninde úshinshi temirjol vokzaly salynatyn boldy. Bul týraly qalalyq máslıhattyń XXV sessııasynyń otyrysynda qala ákiminiń orynbasary Muhıt Ázirbaev aıtty, dep habarlaıdy QazAqparat tilshisi.

Onyń aıtýynsha, Almaty-3 vokzalynyń qurylysyn «Qazaqstan temir joly» AQ usynǵan. Mundaı múmkindik jolaýshylar aǵynynyń júkterin túsirýge múmkindik beredi.

«Qazir Saın kóshesi arqyly Boraldaı aýdanyna qatynaıtyn negizgi jol salý josparlanyp otyr. Jańa vokzal Almatynyń búkil batys aımaǵyn qamtıdy. Úshinshi vokzaldyń bazasynda kólik-logıstıkalyq habty damytýǵa bolady»,- dedi Almaty qalasy ákiminiń orynbasary Muhıt Ázirbaev.

Buǵan deıin Erbolat Dosaev Almaty-3 temir jol vokzalynyń qurylysy bastalatynyn aıtqan edi.

Ákimniń sózinshe, 2025 jylǵa deıin Qulja tasjoly men Boraldaı-Shamalǵan trassasyn, 2030 jylǵa deıin Talǵar traktisi men joǵarǵy Qaskeleń joly keńeıtiledi.