Almatyda úshem dúnıege keldi - dárigerler kúrdeli ota jasady

ALMATY. QazAqparat- Perınatologııa jáne balalar kardıohırýrgııasy ortalyǵynda salmaǵy 1990, 1940 jáne 2200 gramm úsh ul bala dúnıege keldi. dep habarlaıdy QazAqparat tilshisi.

S.Asfendııarov atyndaǵy QazUMÝ baspasóz qyzmetiniń málimetinshe, balalar kesar tiligi arqyly dúnıege keldi. Operatsııa kúrdeli boldy. Otany professor, medıtsına ǵylymdarynyń doktory, №2 akýsherlik jáne gınekologııa kafedrasynyń meńgerýshisi, 30 jyldan astam tájirıbesi bar dáriger Sáýle Isenova jasady.

«Uldar júktiliktiń 34 aptasynda dúnıege keldi. Balalardyń árqaısysy óz uryq qabyǵymen týdy. Jatyr qýysynan shyǵarylǵannan keıin ǵana uryq qabyǵy ashylyp, náresteler dúnıege keldi. Shala týǵan sábıdi alýdyń bul ádisi ártúrli múshelerde qan ketýmen baılanysty kóptegen asqynýlardyń aldyn alady. Operatsııa bir saǵattan astam ýaqytqa sozyldy jáne sátti ótti. Qazir ana ózin jaqsy sezinedi», - dedi QazUMÝ professory Sáýle Isenova.

Aıta ketsek, jaqynda Sáýle Shaıkenqyzy osyndaı bosandyrýdy qabyldaǵan. Úshem EKU uryqtandyrý jolymen dúnıege keldi. Ota maýsym aıynyń sońynda jasaldy. Anasy men balalary 2 aptadan keıin ortalyqtan shyǵaryldy.