Almatyda úsh aýysymdy mektep máselesi sheshildi

ALMATY. QazAqparat- Almatyda úsh aýysymdy mektep máselesi tolyq sheshildi. Bul týraly máslıhattyń VI sessııasynda Almaty qalasy bilim basqarmasynyń basshysy Lázzat Jylqybaeva aıtty, dep habarlaıdy QazAqparat tilshisi.

«2022 jyldyń jeltoqsanynda Alataý aýdanyndaǵy «Mádenıet» yqshamaýdanynda 1500 oryndyq jańa mektep salý esebinen úsh aýysymdaǵy sońǵy №196 mektep joıyldy. Oryn tapshylyǵy máselesin túbegeıli sheshý úshin Memleket basshysy «Jaıly mektep» ulttyq jobasyn iske asyrýǵa qoldaý kórsetip, 2030 jylǵa deıin bir aýysymdy oqytýǵa kóshýdi qamtamasyz etýdi tapsyrdy», - dedi basqarma basshysy.

Aıtýynsha, «Jaıly mektep» ulttyq jobasy aıasynda megapolıste 37 100 oryndyq 22 mektep salý josparda. Sondaı-aq, 5570 oryndyq 11 nysan iske qosylady.

«Atap aıtar bolsam, bıýdjet esebinen «Qaırat» aýdanynda 1500 oryndyq bir mektep salynady. 920 oryn № 48, №148, №112, №9 mektepterge qosymsha qurylys júrgizý arqyly ashylady. 3150 oryndyq 6 jekemenshik mektep ashý kózdelip otyr»,- dedi Lázzat Jylqybaeva.