Almatyda ýnıversıtetke tıesili 3 jataqhana, 5 zerthana, stadıon men jer jekemenshikke ótip ketken

ALMATY. QazAqparat- Qazaq ulttyq agrarlyq zertteý ýnıversıtetiniń ǵalymdary oqý ornynyń esebinen shyǵarylǵan aktıvterdi qaıtarý máselesin kóterdi. Bul týraly QazUAZÝ baspasóz qyzmetinen málim etti, dep habarlaıdy QazAqparat tilshisi.

QazUAZÝ baspasóz qyzmeti málimetinshe, jekege ótip ketken aktıvterdi qaıtarý máselesi bilim ordasynyń ǵylymı keńes barysynda barlyq jaýapty qyzmetkerler men ǵalymdardyń qatysýmen arnaıy talqylanǵan.

Joǵary oqý orny rektorynyń ınfraqurylymdy damytý jáne áleýmettik máseleler jónindegi orynbasary Qýat Sultanǵazıevtyń baıandaýynsha, shyǵarylǵan aktıvter quramynda 1000 oryndyq 3 stýdenttik jataqhana, jalpy aýdany 18828,5 sharshy metrdi quraıtyn 5 oqý-zerthanalyq korpýs, jalpy alańy 1,8 ga bolatyn jattyǵý-sport kesheni bar 1 stadıon, jalpy aýdany 700 sharshy metr bolatyn ákimshilik ǵımarattar men basqa da jyljymaıtyn múlik obektileri bar.

«Sonymen birge aýmaǵy gektarmen ólshenetin birneshe jer ýchaskeleri de ýnıversıtet menshiginen jekemenshikke ótip ketken. Máselen, jalpy aýdany shamamen 5 gektardy quraıtyn ýnıversıtet ǵımaratynyń janyndaǵy jer ýchaskeleri men 12 ga bolatyn Almaty oblysynyń Talǵar jáne Eńbekshiqazaq aýdandarynda ornalasqan ýnıversıtettiń oqý-tájirıbe sharýashylyqtaryna qajetti jer aýmaǵy da bilim ordasynyń esebinen shyǵarylǵan»,- deıdi Qýat Sultanǵazıev.

Sondaı-aq ǵylymı keńeste oqý ornynyń ıeliginen erterekte shyǵarylǵan jyljymaıtyn múlik tizimi jarııalandy:

- Almaty qalasy Nazarbaev dańǵyly, 176 mekenjaıynda ornalasqan «Agronomııa» fakýltetiniń stýdenttik jataqhanasy turǵyn úıge aınaldyrylǵan jáne jeke tulǵalar jekeshelendirip alǵan;

- Abaı dańǵyly, 30 mekenjaıyndaǵy «Zooınjenerııa» fakýltetiniń jalpy aýmaǵy 4 047 sharshy metr stýdenttik jataqhanasy;

- Abaı dańǵyly, 26a mekenjaıyndaǵy «Zooınjenerııa» jáne «Veterınarııa» fakýltetteriniń laboratorııalyq oqý ǵımarattary, jalpy kólemi – 10 431 sharshy metr;

- Bostandyq aýdany Sátpaev kóshesi, 7a mekenjaıyndaǵy «Zooınjenerııa» fakýltetiniń jalpy kólemi 1 684,6 sharshy metr jataqhanasynyń bir bóligi, 0,3076 ga jer telimimen qosa;

- Abaı dańǵyly, 8a mekenjaıyndaǵy «Aýyl sharýashylyǵyn elektrofıkatsııalaý» fakýltetiniń oqý ǵımaraty, jer telimimen qosa 14.12.2001 jyly №2032 satý-satyp alý kelisimsharty boıynsha Halyqaralyq bıznes ýnıversıtetine (UIB) jekemenshikke berilgen;

- Abaı dańǵyly, 8-8 mekenjaıyndaǵy «Aýyl sharýashylyǵyn mehanızatsııalaý» fakýlteti oqý ǵımaratynyń bir bóligi, jalpy aýmaǵy 997,5 sharshy metr, 0,0388 ga jer telimimen qosa 06.06.2001 jyly «QR Ústel tennısi federatsııasy» QB-ine №1963 memlekettik menshikti satý-satyp alý kelisimsharty boıynsha jekemenshikke berilgen;

- Abaı dańǵyly, 28 mekenjaıyndaǵy jalpy aýmaǵy 1 206,0 sharshy metr. stadıon (sport zalymen) jáne 1,8051 ga jer telimimen qosa 2007 jyly «IRIDA INVEST» JShS-ine keıinnen ıelikten shyǵarý maqsatymen senimdi basqarýǵa berilgen;

- Sondaı-aq 2006 jyly Almaty qalasy Abaı dańǵyly, 28 mekenjaıynda ornalasqan oqý-ákimshilik ǵımarattarynyń, aıaqtalmaǵan qurylys nysandary men aýmaǵy 0,9051 ga bolatyn jer telimi de osy jaýapkershiligi shekteýli seriktestik quramyna ótken.

«Sonymen birge ýnıversıtet aýmaǵynda «RAMS-Qazaqstan» JShS 2021 jyly kópqabatty turǵyn úı qurylysyn bastaǵan. Bul zańsyz qurylys Almaty qalasy ákiminiń sheshimimen toqtatyldy»,- dep atap ótti Qazaq ulttyq agrarlyq zertteý ýnıversıtetiniń baspasóz qyzmeti.