Almatyda Uly Jeńistiń 65-jyldyǵyna oraı eskertkish ashyldy

ALMATY. Mamyrdyń 6-sy. QazAqparat /Ádilet Musahaev/ - Búgin Almaty qalasyndaǵy Alataý aýdanynda Uly Jeńistiń 65-jyldyǵyna oraı merekelik shara ótip, Uly Otan soǵysy men Aýǵan soǵysynyń jaýyngerlerine arnalǵan eskertkishtiń saltanatty ashylý rásimi boldy,

dep habarlaıdy QazAqparat.

Shara barysynda jańadan ashylǵan eskertkishke gúl shoqtary qoıylyp, surapyl soǵysta qaza tapqandarǵa taǵzym etildi.

Eskertkishtiń ashylýyna kelgen qala ákimi Ahmetjan Esimov jurtshylyqty, onyń ishinde UOS ardagerleri men tyl eńbekkerlerin 65-shi ret toılanǵaly otyrǵan meıramdarymen quttyqtap, izgi tilegin bildirdi.

«Biz - keler urpaq, sizderdiń erlikterińizdi, elimizdi fashısterden azat etkenderińizdi eshqashanda umytpaımyz. Sondyqtan da Elbasy Nursultan Nazarbaevtyń osy 65-jyldyqqa arnaıy shyǵarǵan úkiminiń arqasynda meıramdy keń kólemde El bolyp atap ótýdemiz. Almaty qalasynda da osyǵan oraı kóptegen sharalar uıymdastyrylýda, soǵys ardagerlerine barlyq jaǵdaı jasalyp jatyr. Bul eskertkish aýdan boıynsha birinshi ret ashylyp otyr. Sizderge beıbitshilik ómir men elimizdiń ósip-órkendeýin tileımin», dep atap ótti qala ákimi.

Atalmysh aýdanda 91 - Uly Otan soǵysynyń, 99 Aýǵan soǵysynyń ardageri turady.

Merekelik shara barysynda ardagerlerge arnap arnaıy áskerı shatyrlar tigilip, merekelik as berildi.

Sonymen qatar, teatrlandyrylǵan kórinis qoıylyp, ol estrada juldyzdarynyń kontserttik baǵdarlamasymen jalǵasty.

Sondaı-aq aýdanda ornalasqan jedel maqsattaǵy 55-72 áskerı bóliminiń jeke quramy men B.Momyshuly atyndaǵy Respýblıkalyq áskerı mektep-ınternaty túlekteriniń saptyq sherýi boldy.