Almatyda Uly dala oıyndary ótip jatyr

ALMATY. QazAqparat - Almatydaǵy ortalyq ıppodromda ulttyq sport túrlerinen «Uly dala oıyndary» respýblıkalyq festıvali ótip jatyr, dep habarlaıdy QazAqparat tilshisi.  

«Sporttyq Almaty»  baǵdarlamasy aıasynda uıymdastyrylǵan dúbirli dodada 600 sportshy baǵyn synaýda.

Ashylý saltanatynda qala  ákimi Baýyrjan Baıbek Qazaqstan  Prezıdenti Nursultan Nazarbaevtyń «Bolashaqqa baǵdar: rýhanı jańǵyrý»  maqalasynda mádenıet pen jeke ulttyq kodty saqtaýǵa úlken nazar aýdarǵanyn aıtty.

 «Memleket basshysy elimiz táýelsizdikke qol jetkizgen kúnnen bastap tól qundylyqtarymyzdy nasıhattaý arqyly ulttyq sanany jańǵyrtýdy basym baǵyt retinde aıqyndap berdi. Sonyń arqasynda halqymyz umyt bola bastaǵan tilimen, ózindik mádenıetimen, salt-dástúrimen qaıta qaýyshty. Memleket tarapynan Ulttyq sport túrlerine, onyń ishinde kókpar, alaman báıge, aýdaryspaq, teńge ilý, jamby atý, asyq atý, toǵyzqumalaq, qazaq kúresi syndy aıshyqty is-sharalarǵa júıeli túrde qoldaý kórsetilip keledi. Bıylǵy jyldyń aıaǵyna deıin Almaty ıppodromynda  júldelik qory 80 mln. teńgeni quraıtyn 89 báıge ótedi.  Bizdiń qalada qazaq  kúresinen «Almaty Barysy» men «Álem Barysy»  saıystarynyń ótýi de  sport  áýesqoılary úshin erekshe syı bolmaq» -, dedi B.Baıbek.

Óz kezeginde QR Ulttyq sport túrleri qaýymdastyǵynyń prezıdenti Bekbolat Tileýhan  Almatynyń elimizdiń ulttyq sport túrleri boıynsha  saıystar jıi  ótetin elimizdiń sporttyq jáne rýhanı ortalyǵyna aınalǵanyn  atap ótti.

«Ulttyq sport ata- babalarymyzdan qalǵan ári barsha álemge maqtanyshpen kórsete alatyn bizdiń  asyl muramyz. Sońǵy jyldary ulttyq sport túrleri tek Qazaqstanda ǵana emes, tipti shetelde de qarqyndy damyp, elimizdiń abyroı- bedelin arttyra túsýde. Onyń jarqyn mysaly «EKSPO-2017» aıasynda  kókpardan ótetin  álem chempıonaty», - dedi B. Tileýhan.

Aıta ketý kerek, dúbirli dodada sporttyń 12 túri boıynsha saıys ótip jatyr. Onyń ishinde 4 shaqyrymdyq taı jarys, 7 shaqyrymdyq qunan báıge, 13 shaqyrymdyq top báıge, jaıdaq báıgeler, 21 shaqyrymdyq alaman báıge, kókpar, aýdaryspaq, teńge ilý, toǵyzqumalaq, asyq atý, jamby atý, qazaq kúresi  bar.

Bıyǵy júlde qory 24 mln. teńge.

Sondaı-aq festıval qonaqtarynyń búrkitter men ańshylyq tazy ıtterdiń saf ónerin, qoldan jasalǵan qoldanbaly buıymdardyń kórmesin tamashalaýǵa múmkindikteri bar.