Almatyda «Uly dala oıyndary» festıvaline 150-den astam adam qatysýda (FOTO)

ALMATY. QazAqparat - Búgin Almatyda QR Táýelsizdiginiń 25 jyldyǵy men Almaty qalasynyń 1 000 jyldyq mereıtoılary qarsańynda jáne «Sporttyq Almaty» baǵdarlamasyn damytý maqsatynda ulttyq sport túrlerinen Respýblıkalyq «Uly Dala oıyndary» festıvali bastaldy.

Almatynyń ortalyq ıppodromynda ótip jatqan sharaǵa qala ákimi Baýyrjan Baıbek qatysty.

«Búgin Almatyda Elbasynyń tapsyrmasy boıynsha ulttyq qundylyqtardy nasıhattaý, ulttyq sanany damytý maqsatynda «Uly dala oıyndary» ótkizilip jatyr. Búgingi tańda elmizde ulttyq sport túrlerimen aınalysyp jatqan adamdardyń sany 280 myńǵa jýyqtaıdy. Al olardyń ishinde 2 000-nan astamy - almatylyqtar. ıAǵnı, olardyń sany jyldan jylǵa artyp keledi. Búgingi festıvalge qatysýshylar 8 ulttyq sport túri boıynsha baq synasady. Qatysýshylarǵa sáttilik tileımin», - dedi óz sózinde B. Baıbek.

Uıymdastyrýshylardyń aıtýynsha, bul jobanyń basty maqsaty - memleket basshysy Nursultan Nazarbaev usynǵan «Máńgilik el» ulttyq ıdeıasyn júzege asyrý, ulttyq sport túrlerin damytyp, Qazaqstan halqynyń birligi men yntymaǵyn nyǵaıtýǵa kúsh salý.

Respýblıkalyq «Uly dala oıyndary» jobasynda ulttyq sporttyń 8 túri boıynsha jarys ótkizilýde. Atap aıtqanda, 25 shaqyrymdyq alaman báıge, kókpar saıysy, aýdaryspaq, teńge ilý, qyz qýý, toǵyzqumalaq, asyq atý oıyny, jamby atý túrlerinen báseke uıymdastyrylsa, osy mereıli merekeniń kórermenderi is-shara barysynda qolyna qus qondyrǵan qusbegilerdiń de erkin qımylyn tamashalaı alady.

Respýblıkalyq «Uly dala oıyndary» jobasyna qatysatyn komandalar úlken synnan ótip, osy dúbirli dodaǵa joldama alyp otyr. Qazaq eliniń tuńǵysh astanasy bolǵan Orynbor qalasynyń, ekinshi astanasy Qyzylorda qalasynyń, sondaı-aq, qazirgi tańda buqara arasynda «Ońtústik astana» ataýymen málim Almaty qalasynyń, qazirgi elordamyz Astana qalasynyń qurama komandalary qatysýda. Barlyǵy 150-den astam qatysýshy óz sheberlikterin pash etedi.