Almatyda «Uly dala – kóshpendiler álemi» etnofestıvaliniń birinshi kúni qalaı ótti

ALMATY. QazAqparat- «Uly dala – kóshpendiler álemi» etnofestıvaliniń alǵashqy kúninde almatylyqtar kóshpendilerdiń jaýyngerlik oıyndaryn, at sporttyq jáne aıtys ónerin tamashalady, dep habarlaıdy QazAqparat tilshisi.

Qala turǵyndary men qonaqtary kóshpendilerdiń jekpe-jek oıyndary, at sporty óneri, sadaqshylar arasyndaǵy jarys, dástúrdi dáripteýshilerdiń kórmesin tamashalady. Sonymen qatar «Boraldaı saq qorǵandary» arheologııalyq saıabaǵynda kelýshilerge ulttyq taǵamdar men qolóner buıymdaryn daıyndaý boıynsha baıqaýlar, sheberlik dárister ótti.

Festıvalde Ázerbaıjan, Túrkııa, Majarstan (Vengrııa), Malaızııa, Bashqurtstan, Daǵystan, Chývashııa, Altaı, Býrıatııa, Ózbekstan jáne Qyrǵyzstannyń úzdik etnomýzykanttary men sportshylary óner kórsetti.

Sondaı-aq festıval qonaqtary uly dala kóshpendileriniń ejelgi mádenıeti men dástúrlerin tamashalady. Ol úshin saıabaq aýmaǵynda 50 kıiz úı tigildi. Etnoaýylda, qazaqtyń dástúrli altybaqany ornatylǵan.

Aıta keteıik, festıval erteń de jalǵasady. Kirý tegin.

Ótetin orny: Almaty qalasy, Alataý aýdany, «Boraldaı saq qorǵandary» arheologııalyq parki.

Shara ótetin jerge arnaıy avtobýstarmen jetýge bolady:

1. Ortalyq stadıon;

2. Natalıa Sats atyndaǵy teatr (Altynsarın kóshesi, 22);

3.Alataý dástúrli óner teatry (Momyshuly kóshesi jaǵynan);

4. Almaty-1 temirjol vokzaly (avtoturaq)

Buǵan deıin qalalyq mádenıet basqarmasynyń basshysy Ǵanı Maılybaev Almaty kúnine arnalǵan merekelik is-sharalar qyrkúıek aıynyń sońyna deıin sozylatynyn aıtqan bolatyn.