Almatyda ulttyq sport túrlerinen jarystar ótti
Almatydaǵy Naýryz merekesi «Astana» alańy men Atletter aýylynda toılanyp jatyr. Keshe, 22 naýryz kúni ótken ulttyq oıyndar boıynsha saıysta almatylyqtar belsendilik tanytty.
«Astana» alańynda ótken saıysta qoshqar kóterýden Qýandyq Sultanov esimdi almatylyq úzdik dep tanyldy. Ol «Sporttyq Almaty» baǵdarlamasy aıasynda uıymdastyrylǵan saıysta 45 keli qoshqardy 150 ret kóterdi.
- Kishkentaı kezimde kúsh qoldanylatyn sport túrlerimen aınalysyp, jarystarǵa qatysqanmyn. Qazir, ókinishke oraı, jattyǵýǵa ýaqyt joq, úsh jyl boldy jattyqpaǵanyma. Biraq, osyndaı syıdy utqanym úshin qýanyshtymyn. Barlyǵyn Naýryz merekesimen quttyqtaımyn, - deıdi jeńimpaz Qýandyq Sultanov.
«Astana» alańynda munymen qatar, qazaq kúresi, baǵanaǵa shyǵý, qoshqar kóterý, qol kúresi, asyq atý jáne toǵyz qumalaqtan jarystar ótti.
Al, «Atletter» aýylynda da qazaq kúresi, asyq atý,qol kúresi, gir kóterý jáne qoshqar kóterýden jarys ótti. Munda Evgenıı Kıshırskıı esimdi almatylyq turǵyn qoshqardy 240 ret kóterdi.
Qazaq kúresinen de úzdik balýandar anyqtalyp, olarǵa dıplom men medaldar tabys etildi.