Almatyda túrkitanýshy ǵalym Ǵubaıdolla Aıdarovtyń ǵylymı eńbegi tanystyryldy

ALMATY. QazAqparat - Búgin halyqaralyq Túrki akademııasy kórnekti túrkolog Ǵubaıdolla Aıdarovtyń «ıAzyk orhonskıh pamıatnıkov drevnetıýrkskoı pısmennostı VІІІ veka» atty ǵylymı eńbegin qaıta jaryqqa shyǵaryp, oqyrmanǵa tanystyrdy, dep habarlaıdy QazAqparat tilshisi.

Osydan 50 jyl buryn basylyp, búginde tabyla bermeıtin sırek kitapqa aınalǵan irgeli eńbektiń tusaýkeser rásimi Ǵ.Aıdarovtyń týǵanyna 100 jyl tolýyna arnalǵan halyqaralyq konferentsııa aıasynda uıymdastyryldy.

Ál-Farabı atyndaǵy Qazaq ulttyq ýnıversıtetinde ótken alqaly jıynǵa ál-Farabı atyndaǵy Qazaq ulttyq ýnıversıtetiniń rektory Janseıit Túımebaev, Halyqaralyq Túrki akademııasynyń prezıdenti Darhan Qydyráli, kórnekti túrkolog Osman Fıkrı Sertkaıa, Ázerbaıjan Ulttyq Ǵylym akademııasy Nahchyvan fılıaly, Óner, til jáne ádebıet ınstıtýty dırektory Abýlfaz Kýlıev, belgili qalamger, Qazaqstannyń eńbek sińirgen qaıratkeri Smaǵul Elýbaı, Qyrǵyzstan Manas atyndaǵy ýnıversıtettiń professory Qonqobaev Qadyraly, Reseı Ǵylym akademııasy Ýfa ǵylymı ortalyǵy Tarıh, til, ádebıet zertteý ınstıtýtynyń ǵylymı jetekshisi Fırdaýs Hısamıtdınova, QazUÝ Abaı ǵylymı-zertteý ınstıtýtynyń dırektory Janǵara Dádebaev, A.Baıtursynuly atyndaǵy Til bilimi ınstıtýtynyń dırektory Anar Fazyljanova, tanymal túrkolog Erden Qajybek, sonymen qatar Ǵ.Aıdarovtyń balalary, tanymal ǵalymdar men zııaly qaýym ókilderi qatysty.

«Biz ákemizdi maqtan tutamyz. Onyń abyroıy men bedeli biz úshin asa qymbat. Onyń Uly Dala tarıhyna baılanysty áńgimeleri men ǵalymdarmen júrgizgen pikir talastary áli esimde. Úılengennen keıin ákem kezekshi ǵylymı ekspedıtsııalarǵa ketetin, al anam úıde qalatyn, ol 8 balanyń tárbıesine jaýapty boldy. Anam 35 jyldan astam ýaqytyn muǵalimdik qyzmetke arnady», - dedi Ǵ.Aıdarovtyń úlken uly Naýryz Aıdarov.

Oqyrmanǵa jol tartqan jańa basylym Orhon ózeni ańǵarynan tabylǵan kóne túrki jazba eskertkishteri tilin fonetıkalyq, leksıkalyq, morfologııalyq jáne sıntaksıstik turǵydan jan-jaqty taldap, qazirgi túrki halyqtary tilderimen sabaqtastyǵyn ashyp kórsetedi.

Avtor óz zertteýine Tonykók, Kúltegin, Bilge qaǵan, Ongın, Kýlı-Chor qatarly mańyzdy eskertkishter mátinderin arqaý etken. Kitaptyń sońynda birqatar eskertkishterdiń mátini, transkrıptsııasy men orys tiline aýdarmasy, grammatıkalyq forma kórsetkishteri jáne shaǵyn sózdigi qosa berilgen.

Aıta ketý kerek, Túrki akademııasy jaryqqa shyǵarǵan ekinshi basylymda buryn tehnıkalyq sebeptermen ketken qatelikter túzetilip basyldy.

Sonymen qatar, konferentsııa barysynda ǵalymnyń úlken qyzy Sáýle Ǵubaıdollaqyzyna Túrki akademııasy tarapynan arnaıy qurmet kórsetildi.