Almatyda turǵyn úı sertıfıkattarynyń somasy 1,5 mln teńgege deıin kóbeıtildi

ALMATY. QazAqparat - Almaty qalasy máslıhatynyń kezekten tys sessııasy barysynda turǵyn úı sertıfıkattarynyń jańa mólsheri bekitilip, turǵyn úı sertıfıkattaryn alýshylardyń sanattary aıqyndaldy, dep habarlaıdy QazAqparat tilshisi.

Almaty qalalyq ákimdigi baspasóz qyzmetiniń málimetinshe, Memleket basshysy Qasym-Jomart Toqaevtyń tapsyrmasy aıasynda megapolıste halyqtyń áleýmettik osal toptaryn qoldaýdy keńeıtý boıynsha keshendi sharalar júzege asyrylyp jatyr.

«Áleýmettik sıpattaǵy máseleler Almaty ákimdigi úshin basym baǵyttardyń biri. Osyǵan baılanysty qala ákimi Erbolat Dosaevtyń usynysy boıynsha turǵyn úı sertıfıkattarynyń somasy 1 mln teńgeden 1,5 mln teńgege deıin ulǵaıtyldy»,- dep habarlady ákimdikten.

Kezekte turǵandar qatarynan sertıfıkat alýshylar sanatyna kelesi azamattar jatady:

- 1 jáne 2 toptaǵy múgedekter;

- múgedek balalary bar nemese olardy tárbıeleýshi otbasylar;

- jetim balalar jáne ata-anasynyń qamqorlyǵynsyz qalǵan balalar;

- kópbalaly otbasylar;

Esterińizge sala keteıik, turǵyn úı sertıfıkattary Almatyda áleýmettik turǵyn úıge kezekte turǵan azamattar úshin jeńildetilgen ıpotekalyq nesıeleý baǵdarlamasy aıasynda bastapqy jarnanyń bir bóligin óteý úshin qoldanylady.