Almatyda turǵyn úı kesheniniń birinshi qabatynda alǵash ret memlekettik balabaqsha ashyldy
Bostandyq aýdanyndaǵy mektepke deıingi uıymdarda oryn tapshylyǵyn tómendetý maqsatynda Almaty qalasy ákimdigi men qurylys kompanııalary arasynda jasalǵan memorandým aıasynda salynǵan №189 memlekettik balabaqsha ashyldy.
«Akvarel» turǵyn úı kesheniniń birinshi qabatynda ornalasqan balabaqsha 300 orynǵa eseptelgen, balalardyń densaýlyǵyn, oı-órisin, oılanýy men logıkasyn damytýǵa arnalǵan zamanaýı qurylǵylarmen jabdyqtalǵan. Munda ınklıýzıvti bilim berý úshin barlyq jaǵdaı jasalǵan. «Robototehnıka», «Sensorıka», «Qolóner» jáne «Montessorı» kabınetteri ashyldy.
Oıyn alańdarynda oıyn keshenderi men kóleńkeli shatyrlar ornatylǵan. Balalardyń ımmýnıtetin nyǵaıtý maqsatynda balabaqsha «tuz shahtasymen» jabdyqtalǵan. Beınebaqylaý júıesi de iske qosylǵan.
Almaty qalasy bilim basqarmasynyń málimetinshe, mektepke deıingi uıymdarda oryn tapshylyǵyn tómendetý boıynsha jumystar erekshe baqylaýda. Osy jyldyń basynan bastap qala boıynsha 2 630 oryndyq 46 jeke balabaqsha ashyldy, osy jyldyń sońyna deıin 320 oryndyq 2 memlekettik jáne 2 600 oryndyq 29 jeke balabaqsha ashý josparda.
2022 jyly 7 179 oryndyq 109 balabaqsha ashyldy, onyń ishinde 120 oryndyq 1 memlekettik jáne 7 059 oryndyq 108 jeke balabaqsha. Osylaısha, 10 109 oryndyq 156 balabaqsha ashyldy.
Sonymen qatar, balalardy mektepke deıingi tárbıemen jáne oqytýmen qamtýdy arttyrý úshin jekemenshik balabaqshalarda memlekettik bilim berý tapsyrysyn ornalastyrý boıynsha konkýrs ótkiziledi. 2023 jyldyń basynan bastap mektepke deıingi tárbıe men oqytýǵa 3 801 orynǵa memlekettik bilim berý tapsyrysyn ornalastyrýǵa 2 konkýrs ótkizildi.
Buǵan deıin Memleket basshysy Qasym-Jomart Toqaev Almaty qalasyna sapary barysynda megapolıstegi balabaqsha tapshylyǵy týraly aıtyp, birqatar tapsyrma bergen edi.
«Balalardy memlekettik bilim tapsyrysy arqyly mektepke deıingi jeke bilim berý mekemelerine ornalastyrý qajet. Ákimdikke úshten alty jasqa deıingi balalardyń 97 paıyzyn mektepke deıingi bilimmen qamtýdy tapsyramyn. Bul mindetti 2025 jylǵa deıin oryndaý kerek», - degen bolatyn Prezıdent.
Oqý-aǵartý mınıstrliginiń málimetinshe, bıyl balalardy mektepke deıingi bilim berý uıymdarymen qamtý maqsatynda respýblıka boıynsha 81 myń jańa oryn ashylady.
«Memleket basshysynyń tapsyrmasyna sáıkes 2 jastan 6 jasqa deıingi balalardy mektepke deıingi bilim berý uıymdarymen qamtý maqsatynda jyl sońyna deıin respýblıka boıynsha 81 myń jańa ornyn ashý josparlanyp otyr. Elimizde 11 317 mektepke deıingi uıymdar jumys jasaıdy, balalardy qamtý deńgeıi – 89,1%», - dep atap ótti mınıstrliktiń baspasóz qyzmetinen.
Mektepke deıingi mekemelerge qabyldaý jyl boıy júrgiziledi. Maýsym aıynda Almaty, Astana qalalarynda, Ulytaý, Qostanaı, Mańǵystaý oblystarynda jańa toptardy jasaqtaý aıaqtalǵan. Al qalǵan óńirlerde bul jumys qyrkúıek aıyna deıin jalǵasady.