Almatyda týǵan qyzyn eki jyldan beri zorlap kelgen áke 20 jylǵa sottaldy

ALMATY. QazAqparat - Almatyda týǵan qyzyn zorlaǵan almatylyq 20 jylǵa sottaldy, dep habarlaıdy QazAqparat jergilikti polıtsııaǵa silteme jasap.

QK 120-baby 4-bóligimen tirkelgen qylmystyq isti Almaly aýdandyq polıtsııa basqarmasy tergedi.

Іs júrgizý materıaldarynda 1979 jyly týǵan M. esimdi azamat 2021 jyldan beri 2009 jyly týǵan kámeletke tolmaǵan qyzymen birneshe ret jynystyq qatynasqa túsip, moraldyq zııanmen qosa densaýlyǵyna da zııan keltirgeni anyqtaldy.

Eki jyldan keıin qyz bala bul jaıynda anasyna aıtyp bergen. Ol óz kezeginde polıtsııaǵa aryzdandy.

M. dereý ýaqytsha ustaý ızolıatoryna qamaldy.

Sodan keıin sot ony qamaýǵa alý jóninde sanktsııa berdi.

«Kúdiktiniń kinási birqatar saraptama nátıjesimen, jábirlenýshi qyzdyń túsiniktemesimen jáne tergeý arqyly dáleldendi», - deıdi Almaly aýdandyq polıtsııa basqarmasynyń bastyǵy, polıtsııa podpolkovnıgi Oljas Sháripov.

2023 jylǵy 16 tamyzda Almaty qalasynyń qylmystyq ister jónindegi mamandandyrylǵan aýdanaralyq sotynyń úkimimen M. QK 120-baby 4-bóliginde kózdelgen qylmysty jasaǵany úshin kináli dep tanylyp, 20 jylǵa bas bostandyǵynan aıyryldy.