Almatyda tozyǵy jetken úıler óte kóp - Erbolat Dosaev

ALMATY. QazAqparat- Almaty ákimi Erbolat Dosaev qaladaǵy apatty jaǵdaıdaǵy úılerdi buzýdyń jańarǵan baǵdarlamasyn ázirleý aıaqtalyp qalǵanyn aıtty, dep habarlaıdy QazAqparat tilshisi.

Masanshy kóshesindegi tozyǵy jetken 23a úı turǵyndary ákimnen olardy basqa jaqqa kóshirýdi surady.

Aıtýlarynsha, 23a mekenjaıdaǵy úı 1938 jyly salynǵan, qazirgi jaǵdaıy óte nashar.

«Qazir biz jańarǵan renovatsııalaý baǵdarlamasyn daıyndaýdyń sońǵy satysyndamyz. Baǵdarlama ishinde biz qalanyń qandaı múmkindikteri bolatynyn qarastyramyz. Ókinishke oraı, qalada buzýdy nemese jóndeýdi qajet etetin tozyǵy jetken turǵyn úı qory óte úlken. Qala balansynda mundaı aqsha joq. Investordy tabý múmkin bolmaı jatyr. Kópqabatty avtoturaq salý týraly usynysy bar nusqaǵa men ruqsat bermeımin»,- dedi ol.

Erbolat Dosaev atalǵan mekenjaıdaǵy úı eskirgen baspanalar tizimine engizilgenin jetkizdi.

«Almaly aýdanynda 131-úı eskirgen bolyp sanalady. Sizdiki de tizimge engizilgen. Biz bylaısha keliseıik, qalanyń múmkindigine qaraı ne isteý kerektigin kóremiz. Eger biz bıýdjet qarajaty esebinen satyp alyp, sizdi kóshire alsaq, men muny isteımin»,- dedi qala ákimi atalǵan úıdiń turǵynyna bergen jaýabynda.

Buǵan deıin, Almaty ákimi megapolıstegi tozyǵy jetken úıler bıýdjet esebinen súriletinin aıtqan edi.

2022 jyly Almatyda 278 páterlik 32 apatty úı buzylatyny týraly jazǵan bolatynbyz.