Almatyda tómengi synyp oqýshylaryn tegin tamaqpen qamtamasyz etýge 5,3 mlrd teńge bóledi

ALMATY. QazAqparat - Almatyda «Balalar jyly» aıasynda 1-4 synyp oqýshylaryn tegin tamaqpen qamtamasyz etý úshin jergilikti bıýdjetten aǵymdaǵy jyly 5,3 mlrd teńge bólý usynylady. Bul týraly Almaty qalalyq máslıhatynyń XVI sessııasynda shahar basshysy Erbolat Dosaev aıtty, dep habarlaıdy QazAqparat tilshisi.

Sondaı-aq balalardyń sport sektsııalaryna qoljetimdiligi úshin sport úıirmelerin qarjylandyrý 1,5 mlrd teńgeden 3,2 mlrd teńgege deıin ulǵaıady. Al oqýshy oryndarynyń tapshylyǵyn tómendetý maqsatynda 46 orta bilim berý obektisiniń qurylysy jalǵasady. Onyń 22-si aǵymdaǵy jyly (14 245 oqýshy ornyna) paıdalanýǵa beriledi.

Bostandyq, Áýezov, Almaly, Jetisý aýdandaryndaǵy mektepterge japsarlas 5 ǵımarattyń qurylysyn aıaqtaýǵa qosymsha 1,8 mlrd teńge bólý usynylady.

Sondaı-aq, halyqtyń áleýmettik osal toptaryn qoldaý maqsatynda jumyspen qamtý baǵdarlamasyn qarjylandyrý jalǵasyp jatyr. Múgedekter úshin áleýmettik jumys oryndaryna qarjy qarastyrý josparlanýda.

Múmkindigi shekteýli tulǵalarǵa arnalǵan 7 ortalyqtyń úzdiksiz jumys isteýi úshin 128,5 mln teńge somasyna medıtsınalyq jáne turmystyq jabdyqtar satyp alý kózdelip otyr.