Almatyda TMD elderiniń qaýipsizdigi máselesi talqylandy
Armenııa, Belarýs, Qazaqstan, Qyrǵyzstan, Reseı, Tájikstan elderi Qarýly Kúshteriniń delagatsııasy men TMD qorǵanys mınıstrligi keńesiniń hatshylyǵy zamanaýı jaǵdaılardaǵy RHB qaýipsizdiginiń basty qaýipterin talqylady. Odan basqa, TMD-nyń biriktirilgen radıatsııalyq, hımııalyq jáne bıologııalyq ahýaldary damýynyń basty baǵyttary anyqtaldy jáne ózara is-qımyl jospary naqtylandy.
Kezdesýdi qorytyndylaı kele, TMD elderi Qarýly Kúshteriniń radıatsııalyq, hımııalyq jáne bıologııalyq qaýipsizdigine baǵyttalǵan kelissóz tabysty ótti.
Radıatsııalyq, hımııalyq jáne bıologııalyq qorǵanys basshylarynyń Úılestirýshi komıteti 2008 jyly qarashada quryldy. Jıyn jyl saıyn álippedegi kezek rettiligimen árbir memleket qatysýshylary ótkizedi. Ótken jyly talqylaý Mınsk qalasynda boldy.
Úılestirýshi komıtet kelisimsharttaǵy qatysýshy memleketterdiń aýmaǵynda radıatsııalyq, hımııalyq jáne bıologııalyq ahýalǵa kúndelikti baqylaý júrgizýdi, ózge memleketterdiń aımaǵynda ahýaldyń ózgerýi jáne radıoaktıvti zattardyń, ýly hımıkattar men bıologııalyq quraldardyń taralýyndaǵy qaýiptilik týraly aqparattardy atalǵan memleketterdiń áskerı basqarý organdaryna ýaqytyly jetkizý syndy birqatar mindetterdi atqarady.
Budan basqa, komıtet áskerlerdiń jaýyngerlik daıyndyǵyn joǵarylatýdy, aqparat almasýdyń nysandary men ádisterine biryńǵaı tásilderdi ázirleýmen aınalysady. Jedel esepterdi júrgizý ádisterin, sondaı-aq birikken júıeniń jumys isteýiniń normatıvtik quqyqtyq bazasyn jetildirýdi oryndaıdy.
Atalmysh komıtet quramyna kiretin memlekettermen turaqty negizde TMD-nyń jaǵdaıynda radıatsııalyq, hımııalyq jáne bıologııalyq birikken júıesi áskerleriniń ózara is-qımyldaryn pysyqtaıtyn birlesken jattyǵýlar men jıyndar júrgiziletinin aıta ketken jón.