Almatyda TMD-da balamasy joq zaýyt iske qosyldy
Megapolıs ákimi Baýyrjan Baıbek joǵary tehnologııalyq zaýyttyń el Prezıdenti Nursultan Nazarbaevtyń sheteldik ınvestıtsııany tartý jáne respýblıka aımaǵynda ınnovatsııalyq óndiris qurý jónindegi tapsyrmasyn oryndaý aıasynda ashylǵanyn atap ótti.
Jańa kásiporynda burǵylaıtyn ankerler, asa tózimdi metall arqandar, taý jáne karerde qoldanylatyn bolat torlar shyǵaratyn jáne tehnıkalyq parametri jaǵynan óte qundy jabdyqtar ornatylǵan. Zaýyttyń qýaty joǵary - jylyna 17 myń tonnadan astam bolat ónimderin shyǵarady.
«2016 jyly jobanyń alǵashqy fazasy júzege asyp, «Tokyo Rope Almaty» zaýytynyń ónimderi TMD elderi men Parsy shyǵanaǵynda, sonyń ishinde Saýd Arabııasynyń iri jobalarynda qoldanyla bastady. Bul jabdyqtar Esentaı ózeni jaǵalaýynyń, Úlken Almaty ózenine deıingi avtojoldardy, Medeý-Shymbulaq aspaly joly men «Myńjylqy» platınasynyń beriktigin arttyrýda paıdalanyldy. Men búgingi birigip atqarylǵan jumystyń Qazaqstanǵa japondyq ınvestıtsııanyń jańa leginiń kelýine serpin beretindigine senimdimin», - dedi «Tokyo Rope Manufacturing» dırektorlar keńesiniń tóraǵasy Shıgeto Tanaka.
Japondyq kompanııa 130-dan astam jyl buryn qurylǵan jáne bolat arqandaryn shyǵarýda álemdik jetekshi kásiporyn bolyp tabylady. «Tokyo Rope» selge, tas, laı kóshkinderine qarsy turatyn jabdyqtar men qurylǵylar da shyǵarady. Japon fırmasynyń bolat arqandary álemdegi 20 iri kópirdiń 12-siniń qurylysynda qoldanylǵan. Japonııada shyǵatyn árbir tórtinshi avtoshınada Tokyo Rope ónimderi bar. Bulardan ózge kompanııa jedel lıftiler men ınjenerlik qorǵanys óndirisi úshin joǵary sapaly arqandar shyǵarýmen de tanymal.
Qala ákimdigi baspasóz qyzmetiniń málimetinshe, Almatynyń ındýstrıaldy aımaǵynda qurylys, farmatsevtıka, hımııa, tamaq jáne jeńil ónerkásip salalary boıynsha 40-tan astam iri otandyq jáne sheteldik jobalar júzege asýda. Bıylǵy jyly 9 jańa joba engizý josparlanǵan.