Almatyda tilderdi oqytýdyń jańa ınnovatsııalyq baǵdarlamalyq kesheniniń tanystyrylymy ótti
Uıymdastyrýshylardyń aıtýynsha, bul oqytý kesheni qazaq tiliniń qoldaný aıasyn keńeıtýge jáne oqytýdyń ınnovatsııalyq formaty retinde toptyq sabaqtar boıynsha oqytýshy men tyńdaýshylarǵa qoldanbaly kómek berýge arnalǵan.
«Tilderdi oqytýǵa arnalǵan bul oqý-ádistemelik keshendi mektepterde, joǵary oqý oryndarynda qazaq tilin ǵana emes, basqa da tilderdi jáne pánderdi oqytýǵa paıdalanýǵa bolady. Bul keshende ınnovatsııalyq tehnologııalardyń sońǵy jetistikteri qoldanyldy. Burynǵy ınteraktıvti taqtany alyp qarasańyz, ol bir orynda turatyn. Oǵan birneshe sym jalǵanatyn. Al mundaǵy japsyrmaly ınnovatsııalyq taqta óte juqa. Qaǵaz sekildi orap, qorapqa salyp alyp kete berýge bolady. Eń bastysy, ol sandyq túrde kodtalǵan. Onyń betine oqytýshynyń arnaıy qalamsabymen jazylǵan kez kelgen syzba kodtar arqyly kompıýterdegi faılǵa avtomatty túrde jazylady. Keıin proektor arqyly taqtada qaıta kórsetiledi», - dedi óz sózinde Almaty qalalyq Tilderdi damytý, muraǵattar jáne qujattama basqarmasynyń tilderdi damytý jáne úılestirý jumystary bóliminiń bastyǵy Baqyt Qalymbet.
Sonymen qatar, ol endi tyńdaýshylarǵa beriletin qaǵaz ben qalmsaptardyń da erekshe bolatyndyǵyn jetkizdi.
«Tyńdaýshylarǵa optıkalyq beınekamerasy bar arnaıy qalamsaptar taratylady. Sonda tyńdaýshylardyń aldyndaǵy arnaıy kodtalǵan qaǵazdyń betine kádimgi sııamen jazǵan jazbalardy beınekamera túsirip alyp, onlaın rejimde kompıýterdegi faılǵa jiberip otyrady. Bul jerde kádimgi A-4 qaǵazy kodtalady. Barlyǵy osy keshendegi baǵdarlamanyń arqasynda júzege asady. ıAǵnı, kompıýterdiń «vord» paraqshasyn ashyp, kompıýterge jalǵanǵan prınterden qaǵazdardy shyǵarsańyz bolǵany, ol kodtalyp shyǵa keledi. Sonda oǵan jazylǵan kez kelgen dúnıe oqytýshynyń kompıýterinde kórinip otyrady. Oqytýshy burynǵy kezdegideı árbir oqýshynyń qasyna kelip, dápterin tekserip jatpaıdy. Barlyq oqýshynyń ne istep otyrǵany oqytýshy kompıýteriniń monıtorynda bólek-bólek faıl bolyp kórinip otyrady. Bul keshen oqytýshyǵa bir mezette barlyq oqýshymen baılanys jasaýǵa, der kezinde aqyl-keńes berýge nemese jumystaryn túzetip otyrýǵa múkindik beredi. ıAǵnı, ýaqyty únemdeledi», - dedi ol.
Budan basqa, til mamany jańa keshendi UBT júıesine de qoldanýǵa bolatyndyǵyn aıtyp qaldy.
«Qaǵaz betindegi test suraqtarynyń barlyǵyna jaýap bergen soń, ondaǵy arnaıy belgini basqan mezet, sol sekýndta testiń nátıjesi ekranǵa shyǵady. Tipti oqýshynyń testke qalaı jaýap berip otyrǵanyn onlaın rejimde ekran arqyly olardyń syrtta turǵan ata-analaryna kórsetip otyrýǵa bolady. Sondyqtan bul baǵdarlamany UBT júıesine de qoldanýǵa ábden bolady. Al keshen arqyly tildi oqytý sapasyna keler bolsaq, ondaǵy kontentti únemi jetildirip, tolyqtyryp otyrý qajet. Byltyr qazaq tiline baılanysty tyńdaýshylarǵa jalǵastyrýshy top deńgeıinde kontent ázirlegen bolatynbyz. Al bıyl tereńdetilgen deńgeıdegi kontentti engizgeli otyrmyz», - dedi ol.
Aıta ketelik, bul keshen memlekettik organdardaǵy qazaq tili kabınetterine ornatylmaq. Keshendi memlekettik tapsyryspen «Jańa sheshimder» JShS jasaǵan.