Almatyda tergeý ızolıatoryna túsken 77 adamnyń 53-i sol kúni bosatylǵan

NUR-SULTAN. QazAqparat – «Adam quqyqtary jónindegi hartııa» qoǵamdyq qorynyń basshysy, Ulttyq qoǵamdyq senim keńesiniń múshesi Jemis Turmaǵambetova jappaı tártipsizdik kezinde Almatynyń tergeý ızolıatoryna qansha adam jetkizilgenin aıtty, dep habarlaıdy QazAqparat.

«13 qańtar kúni úılestirý keńesi Adam quqyqtary jónindegi ýákilmen birge 18-shi tergeý ızolıatoryna jáne Almatydaǵy ýaqytsha ustaý ızolıatoryna bardy. Qazir ulttyq aldyn alý tetiginiń toptary basqa 11 óńirdegi arnaıy mekemeler men tergeý ızolıatorlaryna sapar shegýde. Aldaǵy kúnderi bul top taǵy 5 óńirde bolady. Qoǵam belsendileri 34-ten astam mekemege baryp úlgerdi», - dedi J. Turmaǵambetova Ortalyq kommýnıkatsııalar qyzmetinde ótken baspasóz máslıhatynda.

Mysaly, Almatyda 2022 jyldyń 5 qańtarynan 13 qańtardyń birinshi jartysyna deıin 18-shi tergeý ızolıatoryna 77 adam jetkizilgen.

«Sol kúni prokýrordyń narazylyǵy boıynsha 53 adam tergeý ızolıatorynan bosatyldy. Dárigerler, sonyń ishinde №7 qalalyq klınıkalyq aýrýhana mamandary ustalǵandardy teksergen jáne 68-ine dıagnoz qoıyp, tıisti em taǵaıyndap, usynystar bergen», - dedi Jemis Turmaǵambetova.

Sondaı-aq spıker ustalǵandardyń 90 paıyzǵa jýyǵy QR Qylmystyq kodeksiniń 188-baby 3-bóligi boıynsha – Urlyq (maroderlik) úshin ustalǵanyn atap ótti.

Buǵan deıin Jemis Turmaǵambetova ákimshilik quqyqbuzýshylyqqa kinálilerdi qamaýǵa alýdyń ornyna balamaly jazalaý sharalaryn qoldanýdy usynǵan edi.