Almatyda «Ten Qadam» áleýmettik qoldaý ortalyǵy ashyldy

ALMATY. QazAqparat – Almaty qalasynyń Bostandyq aýdany ákiminiń orynbasary Janar Sádýaqasova onlaın brıfıng barysynda aýdannyń áleýmettik ınfraqurylymy týraly aıtyp berdi, dep habarlaıdy QazAqparat tilshisi.

«Múgedektigi bar tulǵalarǵa áleýmettik qamtamasyz etý máseleleri boıynsha aqparattandyrý jáne keńes berý, sonymen birge tıimdi jumyspen qamtý salasynda áleýetti arttyrý maqsatynda Jandosov kóshesi, 10 mekenjaıynda «Ten Qadam» áleýmettik qoldaý ortalyǵy iske qosyldy. Ortalyqta 28 jumys orny ashyldy. Sonymen qatar, 100 balaǵa arnalǵan jekemenshik balabaqsha qoldanysqa berildi. Onyń 60 oryny «Balapan» baǵdarlamasynyń aıasynda memlekettik tapsyrys boıynsha», – dedi spıker.

Almaty ákimi Baqytjan Saǵyntaevtyń tapsyrmasymen Atakent aýmaǵynda «Áýen álemi» mektebi ashyldy, onda kópbalaly jáne az qamtylǵan otbasylardyń balalary dombyra, shańqobyz jáne gıtarada oınaýdy tegin úırenedi.

Odan bólek, «Atakent» aýmaǵynda syrǵanaý arqyly trıýk jasaýǵa negizdelgen skeıtbord, bıemıks, samokat jáne agressııalyq rolıkter sııaqty ekstremaldy jazǵy sport túrlerine arnalǵan ashyq sporttyq-jattyǵý alańy - Gorilla Atakent Park salyndy.

«Mustafa Óztúrik kóshesi boıynda qaraýsyz qalǵan ýchaske bolǵan, ol ádemi saıabaq etip qaıta jasalyp, sporttyq trenajerler, balalar alańy jáne demalys aımaǵy paıda boldy, aýmaqqa kógaldandyrý júrgizilip, balalar men 12 jasqa deıingi jasóspirimder úshin jańa tennıs korty salyndy. Turǵyn úıdiń qasbetinde Mustafa Óztúriktiń sýreti salyndy», - dedi J.Sádýaqasova.

Aldaǵy ýaqytta aýdanda «Shyńǵa órleý» áleýmettik klýby, «Qol óner úıi» óner sheberhanasy jáne «Alma-ata» kitaphanasyn ashý josparda.