Almatyda temirjol vokzaldarynyń jumysy qaıta bastaldy
Eki aıdan astam úzilisten soń ashylǵan vokzalda adam qarasy az. «Almatyelektrotrans» AQ habarlaýynsha, koronavırýs pandemııasy kezinde barlyq qaýipsizdik talaptary saqtalǵan.
«Kire beriste barlyq jolaýshylardyń dene qyzýy tekseriletin bolady. Barlyq vokzaldardyń ishinde sanıtaızer qoıylǵan. Qyzmetkerlerdiń barlyǵy maska, qolǵappen qyzmet kórsetedi. Vokzaldardaǵy barlyq bólmeler dezınfektsııalyq quraldarmen zalalsyzdandyrylady. Ǵımarat ishinde qashyqtyqty saqtaýdy kórsetetin belgiler ornatylǵan», - dedi kompanııa ókilderi.
Jańa talaptar boıynsha vokzal ishine endi tek bıleti bar jolaýshylar ǵana kire alady. Shyǵaryp salatyndar ǵımarat ishine kirýge tyıym salynǵan.
Temirjol kassalary tańǵy 9:00-24:00 deıin ashyq bolady. Kezek kóbeıip ketpes úshin kassaǵa bólek jol jasalyp, 4 adamnan ǵana kiretin bolady.
«Búgin Almatydan 5 reıs shyǵady. Birinshi reıs Jezqazǵan qalasyna túngi 12:10 attanyp ketken. Ekinshisi tańerteń 8:30-da Pavlodarǵa baǵyt aldy. Almaty-Óskemen, Shymkent, Mańǵystaý, Qazybek bı stansasyna qatynaıtyn qalamańy marshrýty búgin júredi. Erteń Nur-Sultan men Petropavl qalasyna reıster qosylady», - dedi Almaty-2 vokzalynyń bas ınjeneri Mádı Tólebekov.
Onyń aıtýynsha, temirjol bıleti burynǵy baǵamen satylyp jatyr. Karantın kezinde qyzmetkerler sany qysqarmaǵan.
Vokzaldyń perrondarynda baǵyttaıtyn belgiler ornatylǵan. Syrttan kelgen jolaýshylar vokzal ǵımaratyna kirmeı arnaıy dáliz arqyly qalaǵa shyǵyp ketedi.
Sondaı-aq, vokzalda medıtsınalyq pýnkt pen karantın aımaǵy oılastyrylǵan. Munda dene qyzýy kóterilgen jolaýshylar tekseriledi.
Aıta ketý kerek, «Qazaqstan temir joly» 1 maýsymnan bastap jolaýshylar poıyzynyń qozǵalysyn bastady. 15 mamyrdan bastap jol júrý bıletteri satylymǵa shyqty.