Almatyda telefon arqyly qarttardy aldaý deregi kóbeıgen

ALMATY. QazAqparat – Almatyda telefon arqyly qarttarǵa qatysty alaıaqtyq derekteri kóbeıgen, dep habarlaıdy QazAqparat tilshisi.

Almaty qalalyq polıtsııa departamenti krımınaldyq polıtsııa basqarmasynyń málimetinshe, alaıaqtyq is-áreket kóbinese qarttardyń telefonyna qońyraý shalý arqyly jasalady. Bul rette alaıaqtar ózderin jaqyn týysy (uly, qyzy, nemeresi) retinde tanystyryp, olarǵa kenetten shyqqan máseleni sheshý úshin aqsha aýdarý qajet ekenin aıtady.

Mundaı alaıaqtyqtyń kelesideı túrleri bar:

- Sizdiń jaqyn týysyńyz jol apatyn jasady, onyń saldarynan adamdar zardap shekti;

- Sizdiń jaqyn týysyńyz qylmystyq quqyq buzýshylyq jasaǵany úshin qylmystyq jaýapqa tartylýda;

– Sizdiń jaqyn týysyńyzdyń jaǵdaıy aýyr, emdelýi qomaqty qarjyny qajet etetin densaýlyq saqtaý mekemesinde jatyr.

«Biz azamattardy abaı bolýǵa, kúmándi qońyraýlarǵa senbeýge, emotsııaǵa berilmeýge, jaqyn týystarynyń málimetterin aıtpaýǵa, alaıaqtyqtyń bul túrleri jaıynda qarttardy eskertýge shaqyramyz.

1. Jaqyn týystaryńyz ben dostaryńyzdy, ásirese, qart adamdardy mundaı alaıaqtyq týraly eskertińiz;

2. Eger sizge polıtsııa qyzmetkeri qońyraý shalsa, polıtsııa qyzmetkeri sizden aqsha suraýǵa quqyǵy joq ekenin este ustańyz. Áńgimelesýdi bastamas buryn suhbattasýshy ózin tanystyrýy kerek (aty-jóni, aty-jóni, qyzmeti, laýazymy, jumys ornyn aıtýy kerek). Bul málimetti siz 102 nómiri arqyly tekserýińiz kerek.

3. Sizge beıtanys adam telefon soqsa, onyń sizge neni jáne qalaı aıtqysy keletinine nazar aýdaryńyz. Alaıaqtar ádette asyqtyrýǵa, shatastyrýǵa, bolýy múmkin zardaptarmen qorqytýǵa tyrysady.

Kez-kelgen málimetti tekserý qajet jáne aqshany eshkimge jibermeńiz nemese aýdarmańyz», - dep eskertti polıtsııada.