Almatyda taýdan tabylǵan er adam qaıtys boldy

ALMATY. QazAqparat – Almatyda taýdan tabylǵan 35 jastaǵy er adam qaıtys boldy. Bul týraly QR TJM resmı ókili Talǵat Ýálı málimdedi, dep habarlaıdy QazAqparat tilshisi.

Almatynyń taýly aýmaǵynda joǵalyp ketken er adam 2 táýlikten keıin tabylǵanyn jazǵan bolatynbyz.

Qutqarýshylar zardap shekken adamdy jaıaý qaýipsiz jolmen Qumbelsý ózeni arqyly ótetin kópirge tasymaldaǵan edi. Ol ýaqytta er adamnyń jaǵdaıy aýyr bolǵan edi.

«Qutqarýshylar zardap shekken adamdy tapqan sátten bastap, jedel medıtsınalyq járdemge tabys etkenge deıingi tasymaldaý ýaqyty shamamen bes saǵatty aldy.

Saǵat 20.45-te ol jedel medıtsınalyq kómek brıgadasy men Apattar medıtsınasy ortalyǵynyń qyzmetkerlerine jetkizilgen edi. Ekinshi izdeý-qutqarý tobynda bolǵan Apattar medıtsınasy ortalyǵynyń dárigeri er adamnyń qaıtys bolǵanyn anyqtady», - dedi Talǵat Ýálı.