Almatyda taý bókterinde zańsyz salynyp jatqan kópqabatty úı súrildi

ALMATY. QazAqparat – Almatynyń taý bókterinde salynyp jatqan taýnhaýs sot sheshimimen súrilip jatyr, dep habarlaıdy QazAqparat tilshisi.

Nurlytaý shaǵynaýdanynda salynyp jatqan kópqabatty úı búgin sot oryndaýshylarynyń kózinshe buzyldy.

Bıyl naýryzda qala qurylysyn baqylaý basqarmasy júrgizgen jospardan tys tekserý nysannyń zańsyz salynyp jatqanyn anyqtady.

Zańbuzýshylyqty joıý jóninde uıǵarym shyǵarylyp, nysan ıesi ákimshilik jaýapkershilikke tartyldy.

«Nysannyń maqsaty - baý-baqsha bolatyn. Menshik ıesi sáýlet-josparlaý tapsyrmasyn alyp, jobasyn kelisip, odan keıin baý-baqsha úıin salý kerek edi, al ol qurylys jobasyn bekitpeı eki qabatty nysan salyp jatyr. Eger menshik ıesi turǵyn úı keshenin salǵysy kelse, onda ol nysanaly maqsatyn ózgertýi tıis edi. Sodan keıin bul ýchaskeniń qaýipsizdigi men sáıkestigi tekserilýi kerek», - deıdi Alataý jáne Bostandyq aýdandary boıynsha qala qurylysyn baqylaý bóliminiń basshysy Álibek Tulbasıev.

Aıtýynsha, nusqama merziminiń ótýine baılanysty zańbuzýshylyqtar joıylmaı, osyǵan baılanysty materıaldar zańsyz turǵyzylǵan nysandy buzý úshin Bostandyq aýdandyq sotyna joldandy.

Aýdandyq sot nysandy buzý týraly oń sheshim shyǵarǵanymen, nysan ıesi oǵan keri shaǵymdandy.

«Sot otyrysynyń qorytyndysy boıynsha Almaty qalalyq soty Bostandyq aýdandyq sotynyń sheshimin ózgerissiz qaldyrý týraly sheshim qabyldady»,- dedi ol.

Buǵan deıin, Almaty ákimdigi zańsyz salynyp jatqan turǵyn úı keshenderiniń tizimin jarııalaǵan edi.

Eske salaıyq, salynyp jatqan turǵyn úı keshenderiniń qujaty bar-joǵyn qala qurylysyn baqylaý basqarmasynyń senim telefony 8 [phone] arqyly bilýge bolady.