Almatyda taý betkeıinde qurylys júrgizýge tyıym salyndy

ALMATY. QazAqparat – Almatynyń kóshkin júrý qaýpi bar aýmaqtarynda qurylys júrgizýge tyıym salynady. Bul týraly Erbolat Dosaev máslıhat otyrysynda málim etti, dep habarlaıdy QazAqparat tilshisi.

«Taý betkeıiniń tiktigi 15 gradýstan artyq bolýy jáne ınjenerlik-geologııalyq qurylymyna qaraı, aýmaqtyń seısmıkalyq deńgeıiniń joǵarylyǵy (máselen, tereńdigi 20 metrden asatyn sazdy topyraq) kóshkin júrý qaýpin týdyrady. Osyǵan baılanysty, kez kelgen maqsattaǵy ǵımarattardyń jańa qurylysyna tyıym salynady», - dedi Erbolat Dosaev.

Sonymen qatar, ol 2017 jyly toqtap qalǵan qala qurylysy keńesi 1 tamyzdan bastap jańa formatta qaıta jumys isteıtinin aıtty.

«Táýelsiz sarapshylardy tartý jáne qala qurylysy boıynsha sheshimder qabyldaýda olardyń rólin arttyrý kózdeledi. Bul úshin biz qurylys salýshylarǵa qoıylatyn mindetti talaptardy jáne jobalardy qoǵamdyq talqylaýdan ótkizý, sondaı-aq ornalasqan jerine qaramastan, 5 qabattan asatyn barlyq ǵımarattar men qurylystar úshin qala qurylysy keńesiniń oń qorytyndysyn alý sharttaryn bekitýdi usynamyz», - dedi Almaty ákimi.

Qala depýtattary ákim usynǵan jańa normalardy biraýyzdan qoldady.