Almatyda taý basynda qıyn jaǵdaıda qalǵan eki týrıst qutqaryldy

ALMATY. QazAqparat - Respýblıkalyq jedel-qutqarý jasaǵynyń qutqarýshylary Myńjylqy taýynan eki týrısti túsirdi, dep habarlaıdy QazAqparat tilshisi.

2 maýsym kúni respýblıkalyq jedel-qutqarý jasaǵynyń kezekshi pýltine Myńjylqy taýynda qıyn jaǵdaıda qalǵan adamdar týraly aqparat tústi. Belgili bolǵanyndaı, týrıster Bastıonǵa qarama-qarsy jartasqa kóterilip ózdiginen tómen túse almaı qalǵan.

« Oqıǵa ornyna jedel qutqarý toby attandy. Respýblıkalyq jedel-qutqarý jasaǵynyń mamandary shapshańdyǵy men kácibı sheberliginiń arqasynda zardap shekkenderdi tez arada izdep tapty. Olar 50 gradýs eńistegi jartasta shamamen 3500 metr bıiktikte bolǵan. Sondaı-aq, oqıǵa ornyna Almaty qalasynyń qutqarý qyzmetiniń qyzmetkerleri de keldi»,- dep habarlady Respýblıkalyq jedel-qutqarý jasaǵynyń baspasóz qyzmeti.

Ol jaqqa jetý ońaı bolmady. Jartastardan sý aǵyp, úlken tastar tómenge qaraı domalady. Sondaı-aq keı jerlerde qar men muz jatty.

«Tótenshe jaǵdaı qyzmetiniń qutqarýshylary alpınıstik tehnıkany qoldanyp, barlyq kedergilerdi eńsere otyryp, jastardy tómen túsirdi»,- dep atap ótti vedomstvadan.

Qutqarylǵan qyz ben jigit Shyǵys Qazaqstan oblysynan. Ekeýi de qatty sharshaǵan ári kıimderi de mundaı baǵytqa arnalmaǵan.