Almatyda tártipsizdik kezinde zardap shekken kásipkerler shyǵyndy qalaı rastaı alady

ALMATY. QazAqparat - Almatyda jappaı tártipsizdik kezinde zardap shekken keıbir kásipkerler keltirilgen shyǵyndy rastaı almaı otyr. Bul týraly qalalyq kásipkerler palatasynyń dırektory Aıtýar Qoshmambetov málim etti, dep habarlaıdy QazAqparat tilshisi.

Onyń aıtýynsha, shyǵyndy óteý rásimi barysynda rastaıtyn qujattary joq kóptegen kásipkerlerde suraqtar týyndaǵan.

«Qazir bizde taýardyń bar ekenin rastaıtyn urlanǵan qujattarmen týyndaǵan jaǵdaıdy sheshý boıynsha qandaı da bir usynystar joq. Biz bul máseleni kásibı aýdıtorlardyń, býhgalterlerdiń, zańgerlerdiń, tergeý organdarynyń qatysýymen zerttep jatyrmyz jáne Úkimetke usynystar engizýge daıynbyz. Qazirgi ýaqytta kásipkerler shyǵyn somasyn eki tásilmen rastaı alady: ıaǵnı salyq organdarynda bar aınalymdardan esepteý nemese sot saraptamasyn júrgizý arqyly», - dep túsindirdi Aıtýar Qoshmambetov.

Ótinim bergen kezde keltirilgen zalalǵa baılanysty kásipker jeńildetilgen tetik boıynsha (ıaǵnı sot saraptamasyn júrgizbesten) óteýdiń bir nemese birneshe sanatyn (jyljymaıtyn, jyljymaly múlik, taýarlyq-materıaldyq qundylyqtar) tańdaýǵa tıis.

Ótem somasyn esepteý rásimimen kelispegen jaǵdaıda ótinish berýshi qylmystyq is júrgizý kodeksi sheńberinde sot saraptamasynyń qorytyndylaryn qosa bere otyryp júginýge quqyly.

Sonymen qatar, ol zardap shekken bıznesti ornalastyrý úshin alańdar bólingenin aıtty. Mysaly, «Baızaq» bıznes-ortalyǵy 10 keńse ornyn, Fifty four kovorkıng-ortalyǵy 50 jumys ornyn, «Qaynar Bulaq – Almatynyń qaınaý kózi» kovorkıng-ortalyǵy 15 jumys ornyn usyndy.

Budan basqa, «Narkostop» jobasynyń eriktileri men «Sveta vokrýg Sveta» oqý ortalyǵy zardap shekken eki oryn men qala ákimdigin tazalaýdy uıymdastyrdy.

«QR Jıhaz jáne aǵash óńdeý ónerkásibi kásiporyndary qaýymdastyǵy ShOB zardap shekkenderge korpýstyq jıhaz daıyndaýǵa kómek kórsetti. QR Sáýletshiler, dızaınerler jáne qurylys ındýstrııasynyń ózge de kásibı qatysýshylary qaýymdastyǵynyń músheleri eki kásipkerge arnalǵan jumsaq jıhaz daıyndaýǵa tegin kómek kórsetti. Óz kezeginde «KÓMEK-Astana» JShS medıtsınalyq mekeme qyzmetkerlerine ózindik qunynan tómen baǵamen 1583 kostıým daıyndap berdi. Taǵy bir «Ar Shona» kásiporny terezelerdi qalpyna keltirý úshin qarajat bóldi. Almatylyq bıznesmenderdiń biri eki kásipkerge 500 myń teńge kómek kórsetti»,- deıdi spıker.

Qańtardaǵy oqıǵalardyń nátıjesinde Qazaqstannyń shaǵyn jáne orta bıznes ókilderi mıllıardtaǵan shyǵynǵa ushyraǵany belgili.

«Úkimet aldynda el ekonomıkasyn turaqtandyrý mindeti tur. Ásirese, Almatydaǵy kúrdeli jaǵdaı, onda búgingi kúni ótinishterdiń jartysy qaraldy. 10 naýryzǵa deıin ShOB ótinimderiniń 90%-yn qanaǵattandyrý josparlanyp otyr. Jaqyn arada Almatynyń iskerlik ortasy qalpyna keletinine senimdimin»,- dedi ol.