Almatyda tarıhshylardyń VІІ halyqaralyq ǵylymı-tájirıbelik konferentsııasy ótti
Konferentsııa jumysyna Belarýs, Ózbekstan, Tájikstan, Qyrǵyzstan memleketteriniń ókilderi, qazaqstandyq ǵalymdar, qoǵam qaıratkerleri, bilim berý uıymdary, doktoranttar men magıstranttar qatysty.
Konferentsııanyń maqsaty – qazirgi zamanǵy tarıh ǵylymynyń ózekti máselelerin talqylaý, onyń ishinde ǵylymı zertteýlerdiń tulǵataný baǵytyn damytý, «Uly dalanyń uly esimderi» jobasy boıynsha nátıjelerin kópshilikke taratý, óskeleń urpaqqa patrıottyq jáne adamgershilik tárbıe berý.
«Jas ǵalymdardyń halyqaralyq ǵylymı –teorııalyq konferentsııasy osymen jetinshi ret ótkizilip otyr. Jyl saıyn jas tarıhshylardyń sany artyp keledi. Bıylǵy shara Elbasynyń «Uly dalanyń jeti qyry» atty baǵdarlamalyq maqalasy men «Rýhanı jańǵyrý» baǵdarlamasynyń basym baǵyttaryna arnaldy. Konferentsııaǵa qatysýshylar ózderiniń ǵylymı zertteýlerin usyndy. Baıandamalardyń ǵylymı mańyzdylyǵy aıtyldy. Sonymen qatar, qazirgi tarıhı tulǵatanýdyń ózekti máselelerin talqyladyq»,- deıdi Sh.Ýálıhanov atyndaǵy tarıh jáne etnologııa ınstıtýtynyń ǵylymı qyzmetkeri Malıka Morıak.
Konferentsııa materıaldarynyń jınaǵy Qazaqstannyń, shetelderdiń kitaphanalaryna, JOO, ǵylymı-zertteý ınstıtýttaryna taratylatyn bolady.
«Otandyq ǴZI men joǵary oqý oryndaryna Uly dala tulǵalaryn zertteý boıynsha jobalardy ázirleý kezinde sheteldik áriptester, onyń ishinde jaqyn jáne alys shetelderdiń beıindi ǵylymı uıymdary men joǵary oqý oryndarynan jas ǵalymdary tartyldy. Sondaı–aq joǵary oqý oryndaryna dıplomdyq jumystar, magıstrlik dıssertatsııalar, PhD dıssertatsııalyq zertteýler, bilim berý kýrstary taqyryptaryna tarıhı tulǵalardy zertteýge baǵyttalýyn kúsheıtý qolǵa alyndy»,- deıdi Malıka Morıak.
Іs-shara aıasynda «E. Bekmahanov atyndaǵy syılyq» respýblıkalyq baıqaýynyń qorytyndysy shyǵarylyp, jeńimpazdarǵa aqshalaı júldeler tabystaldy.