Almatyda tanymal óner adamdary, jazýshylar, sportshylar daýys berdi

ALMATY. QazAqparat - Almatyda bir top tanymal adamdar men óner adamdary óz tańdaýlaryn jasady, dep habarlaıdy QazAqparat tilshisi.

Júzýden Olımpıada chempıony Dmıtrıı Balandın №376 saılaý ýchaskesinde daýys berdi.
QR eńbek sińirgen ártisi Baqtııar Taılaqbaev búgingi kúnniń mańyzdylyǵyna toqtaldy.
«Saılaýǵa barý – ár adamnyń boryshy. Osy arada «nege?» degen zańdy suraq týatyny anyq. Qazir kóptegen múmkindik ashyldy. Elimizge jaqsylyq alyp keletin ózgerister ornap jatyr. Kóptegen ilkimdi is qolǵa alyndy. Jańa hám tyń bastamalar kóterilip jatyr. Qazirgi saılaý demokratııaǵa jaqyn dep esepteımin», – dedi ánshi.
Jazýshy, dramatýrg Dýlat Isabekov saılaý ýchaskesine ulttyq kıimmen keldi.
«Men azamattyq boryshymdy oryndap, jańa Qazaqstannyń jańa adamdary úshin daýys berdim. Osy múmkindikti paıdalanyp, barsha otandastarymdy Naýryz merekesimen quttyqtaǵym keledi»,- dedi Dýlat Isabekov

Qazaqstan jazýshylar Odaǵynyń tóra

ǵasy, Qazaqstannyń eńbek sińirgen qaıratkeri, aqyn Ulyqbek Esdáýlet búgingi saılaý naýqanynda daýys berýiniń maqsaty – Májiliske jáne jergilikti máslıhattarǵa halyqqa jany ashıtyn bilimdi tulǵalardy tańdaý ekenin atap ótti.
«Elimizdi jańartý, Ádiletti Qazaqstan qurý, ádil qoǵam qurý – ońaı sharýa emes. Onyń bir basy árıne, zańdarǵa kelip tireledi. Sondyqtan Parlamentte otyratuǵyn erteńgi zań qabyldaýshy tulǵalar jan-jaqty bilimdi, zııaly jáne eline-jerine, halqyna jany ashıtyntuǵyn adam bolýy kerek. Biz búgingi saılaýda Parlamentke dál sondaı tulǵalardy, el muń-muqtajyn kóre biletin, aıta biletin jáne zań júzinde iske asyra alatyn adamdardy tańdaý úshin óz daýsymyzdy berdik. Saılaý ýchaskesine kelgendegi oıym osyndaı boldy», – dedi U.Esdáýlet.
Al, akter Áset Imanǵalı eldiń erteńi óz qolymyzda dep esepteıdi.
«Búgin bizde memleketimizde aıtýly kún. Eldiń erteńi óz qolymyzda. Eldiń eldigi, bereke-birliginde. Men saılaýǵa baryp óz tańdaýymdy jasadym. Siz de qapy qalmańyz. Bul elimizdiń erteńi, urpaǵymyzdyń bolashaǵy úshin úlken sheshýshi sát», - dedi akter.
№542 saılaý ýchaskesinde óz tańdaýyn jasaǵan «Daryn» memlekettik Jastar odaǵy syılyǵynyń laýreaty, akter Baıǵalı Esenálıev búgingi saılaýdyń el bolashaǵy úshin mańyzdy naýqan ekenin tilge tıek etti.

«Saılaýdyń jaýapkershiligi úlken. Osyǵan deıin de bundaı naýqandarǵa qatystyq. Bastysy qoǵam jańarsa eken degen nıetimiz bar. Bul joly kóptegen ıgi ózgeris bolatyn sııaqty. Ásirese, halyq ishinen shyqqan tulǵalardy baıqaımyz. Qarapaıym jurttyń arasynan depýtat shyqqany jón. Saılaýshylardyń basym bóliginiń daýsyn jınap, halyq saılaǵan depýtat atansa, odan asqan baq bolmas. Eldiń ishinde júrgender halyqtyń muń-muqtajyn biledi. Naǵyz el-jurtynyń jaǵdaıyn jasaı alatyn, saılaýaldy baǵdarlamasyna sáıkes is qylatyn azamat saılansa degen izgi tilegimiz bar»,- dedi ol.

M.Áýezov atyndaǵy ádebıet jáne óner ınstıtýtynyń dırektory Kenjehan Matyjanov №387 saılaý ýchaskesinde daýys berdi.
«Búgin Qazaqstannyń árbir azamaty úshin asa jaýapty kúnderdiń biri. Óıtkeni elimizdiń bolashaǵy, memleketimizdiń damýy jónindegi úlken iske qadam jasalyp jatyr. Osy ótken bir jyldyń ishinde qanshama saıası naýqandar ótti. Sonda halqymyzdyń árqashan sergektik kórsetip kele jatqanyn kórýge bolady», – dedi Kenjehan Matyjanov.
Sondaı-aq medıtsına ǵylymdarynyń doktory, nýtrıtsıolog, ǵalym Tóregeldi Sharmanov óziniń saılaý ýchaskesine kelip, el aldyndaǵy azamattyq boryshyn oryndap, Májilis pen máslıhat depýtattaryna daýys berdi.