Almatyda tanymal akter Farhat Ábdiraıymovty eske alý keshi ótti
Shara barysynda ataqty akterdiń týǵan-týystary, jaqyn dostary men áriptesteri jyly estelikterimen bólisti. Sondaı-aq, kórermenderge «Dosym» (2023) derekti fılmi men 1999 jyly ekranǵa shyqqan «Fara» kórkem fılmi kórsetildi.
«Biz birge óstik, ákelerimiz jaqsy dos boldy. Biraq, meniń ákem ómirden áldeqaıda erterek ketti, Farhat ekeýmizdiń jasymyzda aıtarlyqtaı erekshelik joq bolsa da, ol ákemniń ornyn basty, únemi janymda boldy, erekshe kóńil bóldi, kómektesti. Onyń meniń ómirimdegi mańyzdy adam bolǵanyn endi ǵana túsine bastadym. Farhat ózi biletinderdiń barlyǵyna derlik kómektesetin, meıirimdi adam bolatyn. Biz ony qatty saǵyndyq. Men onyń qaıtys bolǵany týraly habardy óte aýyr qabyldadym, bul men úshin aýyr soqqy boldy. Áli de bir jerde túsirilimde júrgen sııaqty», - deıdi Farhat Ábdiraıymovtyń jaqyn dosy, prodıýser Arman Ásenov.
Sonymen qatar, ol akterdiń armany týraly aıtty.
«Ol «Fara» fılminiń jalǵasyn túsirgisi keletin, jalpy sońǵy jyldary ózi fılm túsirýdi josparlaǵan edi. Ol óte bilimdi boldy. Sózjumbaqtardy kitap oqyǵandaı jyldam sheshetin. Ol sondaı-aq, barlyǵyna kóp oqýǵa keńes beretin, balalardy jaqsy kórdi», - dep eske alady akterdiń dosy.
Kınorejısser, Qazaqstannyń eńbek sińirgen qaıratkeri Sergeı Ázimov te jyly estelikterimen bólisti.
«Faranyń bir keremet qasıeti boldy. Ol jaı ǵana aqkóńil, qarapaıym adam bolǵan joq, ol árqashan jaqsylyq jasaýdy tý etken azamat edi. Biz onymen jaqsy, shynaıy qarym-qatynasta boldyq. Únemi telefon soǵyp, mereke kezderi quttyqtap, qal-jaǵdaıymdy suraıtyn. Ol óz isiniń kásibı mamany edi, halqy ony qatty jaqsy kórdi, eshqashan umytpaıdy», - dedi ol.
Akterdiń kóptegen áriptesteri men týystary da Farhat Ábdiraıymovtyń boıyndaǵy erekshe qasıetterin atap ótti. Aǵasy Zákir Toqtaev barsha qonaqtarǵa jyly lebizderi úshin alǵys bildirdi.
«Biz ony máńgi este saqtaımyz. Onyń kúlkisin, ázil-qaljyńyn, balalarǵa degen kózqarasyn qasynda bolǵan adamdar eshqashan umytpaıdy. Ol barlyq balalardy qatty jaqsy kóretin. Faraǵa degen ystyq yqylastaryńyz úshin barlyǵyńyzǵa rahmet. Jany, júregi keń, taza peıildi azamat edi», - dedi aǵasy.
Eske salaıyq, tanymal akter Farhat Ábdiraıymov 2021 jyldyń mamyrynda Grýzııada túsirilim barysynda qaıtys boldy.
Farhat Ábdiraıymov 1966 jyly 21 qańtarda Almaty qalasynda týǵan. Almaty tehnologııalyq ýnıversıtetin ınjener-tehnolog mamandyǵy boıynsha bitirgen. 1994 jyldan Sh. Aımanov atyndaǵy «Qazaqfılm» akteri bolǵan edi. «Shanhaı», «Aqsýat», «Ompa», «Mahabbat tálkegi», «Sıqyrshy demeýshi», «Jel adam», «Frantsýz qurbaqasynan ázirlengen borş», «Shekara», «Jan júregim – Astana», «Parallel álem», «Geızer», «Úsh lımon», «Batyr», «Eń sulý» syndy fılmderge túsken.
Basty foto: instagram.com/fara_actor